Shwa ka 15 tarik Nailar yn iasoi MoU bad ka Assam; san tylli ki shnong kin wanphai sha Meghalaya

Syllad | The Rising MeghalayaJune 27, 2025

Ka Sorkar Meghalaya haka sngi Thohdieng ka la pynbna ba ka jingiasoi ia ka Memorandum of Understanding (MoU) kaba pura bad ka Assam halor ka kam khappud kan long hashwa ka 15 tarik Nailar ha kaba san tylli ki shnong ha ka thain Ri Bhoi kin sa wanphai sha Meghalaya.

Haba kren sha ki lad pathai khubor, u Nongaiktien ka Sorkar MDA bad Myntri sorkar, u Bah Paul Lyngdoh u la pynksan ruh halor ki sienjam ba la shim da ka sorkar na ka bynta ban pynbeit ia ki kam iakajia pud bad ka Assam da kaba ong, “Ngi la phah ruh ia ka kynhun ki pulit bad ki Magistrate ban ialeh pyrshah ia ki briew na Assam.

Ia kane u la pynpaw halor ki jingkynnoh ba na ka liang ka sorkar kam shym la leh ei ei ne ka la leh tang khyndiat eh ha kaba iadei bad ki kam wan kyntur pud jong ka Assam ha ka shnong Lapangap ha West Jaintia Hills District.

U Myntri u pynbna ruh ba ka jingiasoi ia ka MoU ba pura bad ka sorkar Assam kan long hashwa k 15 tarik Nailur, ha kaba yn iohi ruh ia ki santylli ki shnong kiba thymmai ki ban wanphai hapoh u pud u sam ka Meghalaya.

Ha kaba iadei bad jingeh ha ka thain Langpih Bah Paul u la ong ba ka jingiakren ia pynbeit ka la jan dep artad. U la ong ba mynta ki donkam ban pynlong ia ka jingleit ia jurip lang bad ba u dang ap ia ka jingpynthikna na u Patowari uba khlieh ia ka Regional Committee halor ka Langpih Sector na ka liang ka Assam.

Nalor kata u Bah Paul u la kdew ruh ba ka jingpynbeit ha kaba iadei bad ka Jaintia Hills Sector ruh ka dang iaid shakhmat bad shen kin sa lah ban shim ia ka rai kaba khatduh.

Ha kajuh ka por u la ban jur ba na ka liang ka sorkar ka la shimkhia ban pyniaid shakhmat ia ki kam ia pynbeit pud bad ym kum ha ki por kiba la dep ha kaba la wan kyntur sha u pud u sam ka Meghalaya khlem kano kano ka jingia aireng.