Shongkun ka jingiaseng samla ka balang Katholik ha Barato, ioh riti treikam ka JDCYM

Syllad | The Rising MeghalayaMay 12, 2022

Ka Kynhun ki Samla ka Balang Katholik jong ka Jowai Diocese hapoh ka lama jong ka Jowai Diocese Catholic Youth Movement (JDCYM) kaba kynthup ia ka East &West Jaintia Hills District, Meghalaya ka la pynlong ia ka Jingiaseng Ialap ha ka 8tarik bad 9 tarik Jymmang 2022 ha ka shnong Barato kaba hap ha U Krist Syiem Parish Barato West Jaintia Hills Meghalaya.

Ka phang pdeng jong kane ka Jingialap mynta u snem ka long, “To suhthied bad to nangsan ha U” (Kolosse 2:7).

Ha ka 8^th Jymmang la sdang ia ka programme da ka Mass Bakhuid ha ka por 12 baje bud pat da ka jingpynher ia ka Lama jong ka seng da u bah Recallme Biam  kum u kongsan bah Romeo Lamare kum u symbud kongsan ha ka jingiadonlang u Rev Fr John Myrboh Parish Priest ka Barato Parish, u Rev Fr Manbha Pakem Diocesan Youth Director, ki sister ki ba trei ha Barato parish, President ka seng u Mutshwa Thabah, Secretary Samla  Emansing Sympli, ki Executive members ha ryngkat ki hajar ngut ki samla kynthei bad shynrang ki ba wan na kylleng ki parish jong ka Jowai Diocese.

Hadein ka jingpynher lama, ki samla ki la ioh lad ban leit jngoh ia ki longing kristan ki ba don ha ka shnong Barato ban ia syllok bad ban ia duwai lang bad ki parabangeit jong ka balang ha kane ka shnong. Ha ka por janmiet pat la ioh ban pynlong ia ka Jingialap bad jingmane sacrament da u Rev Fr Manbha Pakem.

Haka Sngi U Blei kaba taiew bala dep la sdang da ka Mass Bakhuid ha ka por  09: 30 mynstep ha kaba u Rev Fr Ferdinand Dkhar Diocesan Administrator ka Jowai Diocese u long u nongknia rangbah ha ka jingiadon lang jong kiwei pat ki lyngdoh sohblei ka balang. La ioh ia ki kyntien pdiang sngewbha na u president ka seng u samla Mutshwa Thabah bad la ialam rwai da ka kynhun ki samla naka parish Mookyndeng. Hadein ka Mass Bakhuid la ioh ban pyllait ia ka Riti Treikam  (constitution) jong ka seng ki samla ka Jowai Diocese da u Rev Fr Ferdinand Dkhar ha ka jingiadon lang kiwei pat ki lyngdoh sohblei, ka jingsakhi lang ki hajar ngut ki paid riewngeit kiba kynthup ia ki Longkmie, ki Rangbah, ki khynnah rit bad ki khun Samla. Ia kane ka sengbah ki samla ka Jowai Diocese ia kaba la jutip kyrteng kum ka Indian Catholic Youth Movement Jowai Diocese (ICYM-JD) mynta naduh katei ka sngi baka seng ka la ioh ia ka riti treikam (constitution) ba pura bad yn tip kum ka Jowai Diocese Catholic Youth Movement (JDCYM).

Ha ka nohphai sngi, la ioh ia ka jingialap na u bah Dominic Thappa ula ai iaka jinghikai bad ialap ia ka ktien U Blei halor ka phang, “To suhthied bad to Nangsan ha U” (Kolosse 2:7) bad ia ka jingkyrkhu na I Rev Fr Manbha Pakem DYD- JDCYM.

Ha kaba pynkut ia kane ka sngi la ioh ia ka jingpynhiar ia ka lama jong ka seng da u Ma Dawan Lyngdoh MDC ka Mynsngat- Khanduli Constituency ha ryngkat ka jingsakhi lang ki Lyngdoh sohblei, ki nongialam barim jong ka seng bad ki paid riewngeit ka balang katholik.