Shongkun ka Dorbar Ki Kñi bad Ka Kchuu Ka Siang ha Raid Jowai

Syllad | The Rising MeghalayaJune 23, 2025

Kumba ju long khlieh la ka snem, ka Dorbar Ñiam jong ka Raij Jwai haka 22 tarik Jylliew kala pynlong iaka jingiakynduh lang kaba kyrpang jong ki Kñi wa Ka Kchuu Ka Siang ha madan Kñia Pyrthat, Dulong Poh-hali, Jowai.

Iaka jingialang kaba la pyniaid da u Ma Raymond Nartiang Pator ka Raij Jwai la ioh ka nguhblei nguh syien na u Ma Valentideo Paswet Sangot Paswet katba u Dolloi ka Elaka Jowai Ma Puramon Kynjing kum u khlieh ka niam khlieh ka Elaka na ka bynta ka jingmyntoi jong ki Kñi, ka Kchuu ka Siang ula ai ki kyntien kyrpang ha kaba iadei bad ka niam, ka rukom, dustur, riti.

U Ma Puramon Kynjing ula ong, ka Dorbar Niam hapoh ka Raij Jwai ka sdang naduh ki por ba u syiem Pyrthat ula wanrah iaki saw ngut shipara ki khun puri blei kiba long ki nongseng nongsdang iaka raij ka shnong kumjuh iaka niam ka rukom bad ka dorbar Niam kadei ruh ka dorbar ba la hukum da u trai nongbuh nongthaw, kumta kum ka pateng kajuk mynta ul kyntu ban nang pynkhraw shuh shuh iaka jinglong kyrpang jinglong kyntang jong ka Dorbar Niam naduh na iing haduh ka Raij ha shnong.

U Ma O.H. Toi, President Seiñraij Jwai ula iathuh iaki kam kiba ka Seinraij kala leh halor ka thong ban kyntiew iaka niam ka rukom, dustur, riti kumjuh na ka bynta ka bha ka miat ka imlang sahlang jong ki khun ka Niamtre ha baroh ki liang.

Ula kyntu ruh iaki Kñi, ka Kchuu ka Siang ban iatreilang khnang ba kino kino ki jingpyrkhat bad jingangnud jong ka seng ban leh kin long kiba jop.

Khatduh iaka Dorbar la pynwai da ki kyntien khublei bad kitbok kitrwiang na u Ma Raymond Nartiang, Pator Raij Jwai.