Shong bishar kam u Dy CM halor ki kam khappud bad kynthup ia ka shnong Baikam sha ka jylla

Syllad | The Rising MeghalayaJune 7, 2025

U Symbud Myntri Rangbah ka Jylla uba dei ruh u Chairman ka Regional Committee on Interstate Border ka Rilum Jaintia, u Bah Sniawbhalang Dhar ha ka 6 tarik Jylliew u la lum ia ka jingialang bishar kam ha kaba iadei ka kam pynbeit pud hapdeng ka Meghalaya Assam ha Ratacherra da kaba phaikhmat ban kynthup ia ka shnong Baikam shapoh Meghalaya.

Ha kane ka jingialang la ia don lang u Deputy Commissioner, East Jaintia Hills District, u Shivansh Awasthi, Additional Deputy Commissioner, East Jaintia Hills District, Kong J.U Kharpuri, Superintendent of Police, EJH Giri Prasad, Sub-Divisional Officer (Sardar), EJH M. Kumar, Additional Superintendent of Police, Bah S. Paslein, Block Development Officer, Wapung C&RD Block, M. Kyndait, ki Rangbah Shnong ka Baikam, Ratachera, Malidor bad ki nongshong shnong jong ka shnong Baikam.

Haba kren sha ki lad pathai khubor hadien ka jingialang, u Symbud Myntri Rangbah u la ong ba kane ka jingialang ka long kaba seisoh ha kaba u la pyntip ba kashnong Baikam ka kynthup ia 37 tylli ki longiing ha kaba 30 na ki, ki la pynpaw ia ka jingthrang ban don sha ka liang ka Meghalaya.

U la ong ruh ba kane ka jingialang ka la ai ia ka rynsan na ka bynta ki Regional Committee bad ki nongshong shnong ba kin iakren halor kane ka phang bad ia ka jingialang kaba khatduh hapdeng u Deputy Commissioner ka EJH bad na Cachar District, Assam kin sa shong shen ia ka jingialang ban pyniaid shakhmat ia ka jingiakren halor kane ka mat badhadien yn sa aiti ia ka kaiphod sha ka sorkar jylla na ka bynta ban leh ia kaba donkam.

Haba kren halor ki skhim pynroi ba la ioh pdiang da ki nongshong shnong jong ka shnong Baikam, u Symbud Myntri Rangbah u la ong ba kumba ka long mynta ki briew ha kane ka jaka ki la ioh ia ki jingmyntoi na ka liang ka Meghalaya bad ka Assam kumjuh bad kumta ka long kaba kongsan ban lah ban pynbeit ryntih bad ban shim ia ka rai kaba khatduh khnang ba ka jingpynioh skhim sha ki nongshong shnong kan long kaba thikna.

Ha kajuh ka por, u Deputy Commissioner Shivanch Awasthi u pyntip ba ki la pynlong ia bun tylli ki jingialang ha ryngkat ki bor sorkar na Assam ha kine ki por kiba la dep kynthup ia kawei bad u Deputy Commissioner ka Cachar ban iakren ia pynbeit halor ka mat kaba dang sahteng kaba iadei bad ka ka jingpyniasoh ia ka shnong Baikam.