Shitaiew ai por ka KSU bad paidbah Ranikor ia u Syiem bad Myntri ban pynkylla ia ka rai ai jaka sha ki BSF

Syllad | The Rising MeghalayaAugust 21, 2025

Ka Khasi Students’ Union (KSU) South West Khasi Hills District ha ka 20 tarik Nailar ka la hiar sha Photkroh ban pynlong da ka jingialang paidbah ban pynpaw pyrshah ia ka jingthmu jong u Syiem lem bad katto katne ki dkhot ka Executive Durbar ka Hima Maharam ban ai jaka haduh kumba 70 akar sha ki shipai na ka bynta ban shna ia ka Unit Headquarter jong ki BSF ha Photmula SWKHD.

Ha kane ka sngi la wan ban iasnohkti lang da ki spah ngut ki paidbah ha ka jingiadonlang ki nongialam sengbhalang bapher bapher naduh ka  SSSS, HANM, HITO, HNYF nalor ki nongialam ka Seng Samla Kur Syiemlieh Sawkpoh, Ranikor Area Farmers Association, Synjuk ki khun ki Hajar ka Hima Maharam Dong Border, ki Myntri shnong bad kiwei kiwei.

U Forwardman Nongrem President KSU ka District ha ka jingkren u la pynrem jur ia ka jinglong  mutlop bad leh donbor jong u Syiem Maharam lem bad katto katne ki Myntri Hima da kaba ai por ruh shitaiew ban lum ia ka Durbar Hima bad pynpaw ia ka rai ba la weng noh ia kane ka jingthmu lem kumta ki paidbah bad ki khun ki hajar ka Hima Maharam kin sa leh ia kaba donkam.

U la ong ruh kumno u Syiem u ong ym don jaka ban rep ban riang ne ban sah ki khun ki hajar katba ka jaka ka don pat ban leit ai ia ki shipai haduh 70 akar. U la kynthoh ruh da kaba ong ba mynshwa ki Syiem ki ialeh ban pyniar ia u pud u sam Hima hynrei une u Syiem ba mynta pat u ialeh ban die duh ia ki jaka na ka bynta ka spah ka phew ba shipor.

“Ka KSU kam pdiang satia ia jingpynthame jong u syiem da kaba ong ba kane ka dei na ka bynta ka iohkam iohjam ne kata ka bai lutksan da kaba buh jingkylli ruh ba hato iohi seh ba kiba bun ki dei ki nongtrei khasi ha ki jaka shipai kum ha Upper Shillong, Mawshbuit bad wat ha Gumaghat Border Out Post ruh,” u la bynrap.

U la ong ruh ba ka jingong jong u Syiem ban ai compensation ka dei tang ka kam kai namar ngin ym lah ban iapein ia ka pisa ba shipor bad ka lawei jong ki khun Khasi khara bad ki khun ki hajar ka Hima Maharam. U la ong ruh ba ka jingkyllain jong u Syiem lem bad ki katto katne ki dkhot ka Executive Durbar Hima ka la paw shai ba watla ki la tyrwa 2/3 tylli ki jaka sha ki shipai phewse kim long shai ne iathuh haei kita ki jaka kaba pyni ba kane ka dei ka buit sopsop kaba sha lyndet jong u Syiem bad katto katne ki dkhot ka Executive Durbar Hima. 

Nalor kata u la ong ba ka jingdon ka ophis treikam u Syiem ha Photkroh ngi dang pyrkhat kadei na ka bynta ka jingshngain ki khun ki hajar bad ka Hima ne kan dei kata ka jaka ban sngap ia ka jingud jingnam ki khasi ba shong ba shah ha Maharam phewse kaba paw mynta i kumba ka dei ka karkhana shna pisa jong u Syiem bad ki katto katne ki niangkohnguh kiba dei ki nongbud jong u.

Ka Seng ka maham ruh ba kane ka jingialang ha Photkroh ka dang dei tang ka jingsdang bad lada u Syiem bad ki briew jong u ki leh bym patiaw ai ki paitbah bad ki khun ki hajar ka Hima Maharam kin shim ia ki rai bad ki sienjam ba tyngeh nangne shakhmat.