Shitaiew ai por ka JAC iaka NHAI ban pynbeit iaka rukom siew ha toll plaza

Syllad | The Rising MeghalayaMarch 22, 2021

Ka Joint Action Committee (JAC) kaba kynthup iaka ka seng ki nongniah kali ka All Jaintia Tourist Commercial Vehicle Association (AJTCVA) bad ka kynhun ki sengbhalang naduh ka FKJGP JSM, HYC, JYF, WJNC, JSU, HNPF bad kiwei kiwei kila rai ban ai por shitaiew iaka NHAI ban pynbeit iaka rukom khrong bai toll plaza ha Pasyih- Ialong.

Ka JAC hynne ka sngi kala lum iaka jingialang ban iakren halor kane ka jingshim bai toll plaza kaba la kiew ar shah lai shah hadien ka jingpyntreikam iaka FASTag ha Hynniawmer.

Ki nongialam ka JAC hadien ka jingialang kila tur ha khyrdop ka Toll Plaza ban iakren bad ki bor pyniaid bad kila aipor shitaiew naduh mynta ka sngi ban pynbeit mardor iaka rukom siew bai toll plaza.

U Paila Lyngkot ula ong ba ka JAC kala dawa ban pynneh beit iaka dor kumba la rai haka jingialang kaba la long hashuwa bad ka bor synshar district West Jaintia Hills District T.30 shisngi ia baroh ki kali ha rilum Jaintia.

U Paila uba long ruh u president ka AJTCVA ula ong ba kane ka toll plaza ha Pasyih-Ialong kala sdang biang ban shim palat iaka dor kaba la pynbeit ka bor synshar district bad dei namar kane kala pynbitar ia baroh ki nongniah kali kamai kumjuh ki kali shimet.

“Ngin ap iaka rai ka NHAI hapoh shitaiew bad lada kan bteng ban shimkabu ia u paidbah ngin shim da ki rai kiba tyngeh namar ba ki kali ki hap ban siew ha manla ki iaid lyngba ka toll plaza,” la ong u Paila.