Shim jingkhein ka Kong Santa Mary Shylla iaki kam pynroi hapoh constituency

Syllad | The Rising MeghalayaAugust 29, 2025

Ka MLA Sutnga-Saipung, ka Kong Santa Mary Shylla, haka 28 tarik Nailar kala leit ban jurip iaki kam pynroi bad projek hapoh ka constituency jong ka kiba kynthup iaki skul, jaka sumar, surok bad ki jingtei ha kaba iadei bad ki kam sports.

La synran iaka MLA da u Deputy Commissioner, East Jaiñtia Hills District, u S Awasthi, IAS, u SDO- Sadar, M. Kumar IAS, u BDO ka Lumshnong Ma M. Kyndait, u Additional SP Ma S. Paslein nalor ki nongialam shnong.

Ha kane ka jingleit jurip, ka Kong Santa Mary Shylla kala pynthikna ban pynbha pynmiat kloi iaka Government LP School, Ratacherra bad leit jurip ruh iaka skul Wellington Jungai Memorial Secondary School, Ratacherra.

Ka MLA ka jurip ruh iaka jingiaid shaphrang jong ka madan ialehkai Futsal ha Ratacherra kaba la shna hapoh ka DMF kaba la khmih lynti ba ka jingtrei yn pyndep dep hapoh shibnai, bad jurip ruh iaka jingshakri ha Ratacherra Sub-Centre.

Shuh shuh ka MLA kala leit jurip iaka jingiaid shaphrang jong ka skul RMSA Secondary School ha Donaskur bad ka Arecanut Plate Making Unit kaba don ha Wahkoh, Umkiang kaba la bei pisa da ka Basin Development Unit, East Jaintia Hills District.

Ka la ïakren ruh bad ki doctor kumjuh ki nongtrei jong ka Umkiang PHC kaba la dep ban pynbha hapoh ka DMF.

Ka la ai jingiaroh ruh iaka jingshakri ka Sonapyrdi Sub-Centre bad ka jinglah ban pynkha suk iaki longkmie armet.

Ka MLA ka la pynlong ruh ka jingleit jurip iaka jaka na ka bynta ban tei iaka jingkieng doi doi ne Suspension Footbridge ban kam shilliang wah Lukha ha Sonapyrdi bad jurip ruh ïaka jingmaramot iaka surok NH-6 ba dang iaid shakhmat ha Kuliang, Wahkoh bad Ratacherra.

Ka jingiaid shakhmat jong ki kam maramot ka long haduh 80% bad la khmih lynti ba ka jingtrei kan dep ha u bnai Nohprah (December) 2025.

Ka Kong Santa hadien ka jingjurip kala pynpaw iaka jingsngewhun ban iohi ba ki kam ki iaid beit bad bynrap “Ryngkat, ngi tei ïa ka lawei kaba bha na ka bynta ki nongshong shnong jong ngi.”