Shillong Premier League: Shi kol pynliem ka Rangdajied United ia ka Nongrim Hills

Syllad | The Rising MeghalayaSeptember 2, 2025

Ka Rangdajied United FC, ka la lah ba kan khur ia ka nam jop kaba long da 1-0 bad kane ka la wan hadien ba ka la lah ba kan pynliem noh ia ka Nongrim Hills ha ka lympung ialehkai jong ka Shillong Premier League, kaba long ha madan SSA Stadium ha First Ground, Polo haka 1 Nailur.

Ia kane ka jingjop kaba long tang da shi kol, ka jia ryngkhat ba ka dei ka kol kaba la kumba bakla ban thep hi da u player ka Nongrim Hills u Shanborlang Thangkhiew ha ka minit kaba 74, kaba pynlong ia ka Rangdajied United ban khur ia ka lai point na kane ka jingiakhun.

Kine ki ar kynhun ki rung sha kane ka jingiakhun khlem pat lah satia ban khur ia la ka nam jop na ki jingiakhun kiba ki la dep, ha kaba ka Rangdajied United ka la sdang ban iuh kjat ha kane ka lympung da ka nam iakhaid kaba long 0-0 pyrshah bad ka Shillong Lajong FC, ha ka jingiakhun kaba ar, ka la shah liem da 4-0 hakhmat ka Langsning FC.

Kane ka kol kaba la kum thep bakla da u Shanborlang, ka wan hadien ba u Bantiplang Khongnoh u la shut shapdeng ia ka bol, kaba kum shi bynta ba un nym ailad ia u Manbhalang Iawphniaw ka Rangdajied ba un nym ioh ia ka, jlang u kum ioh pyndei ia ka bad jlang kan rung sha la ka jong ka kol.

Da kane ka jingjop kaba hynne ka janmiet, ka Rangdajied United ka ka la ioh ba kan khur 4 point, katba na ka liang ka Nongrim Hills, ka iai bteng ban mad ia la ki sohkthang ki jong ka, hadien ba kan mad ia baroh lai sien lynter ki namrem ki jong ka ha kane ka samoi ialehkai kaba mynta, bad iai neh sha trei duh ka miej iakhein point.

Ka jingiakhun haka 2 tarik Nailur, kan long hapdeng ka Shillong lajong FC pyrshah ia ka Laitkor SC, kaban long ha ka por 4:30 nohphai sngi, ha kaba lada ka Lajong ka khur ia ka nam jop,  joit kan kiew sha ka kyrdan kaba ar, katba na ka liang ka Laitkor, ka jingjop ka lah ban pynlong ia ka ba kan kiew sha ka kyrdan kaba lai.