Shillong Premier League: Khyrwit u Damonlang ar kol, pynliem ka Langsning iaka Rangdajied

Syllad | The Rising MeghalayaAugust 24, 2025

Ka Langsning FC ka la lah ba kan pynliem haduh 4-0 ia ka Rangdajied United FC, ha ka jingiakhun ka lympung Shillong Premier League 2025 kaba la long haka Saitjain ha madan SSA Stadium First Ground, Polo.

U namtam ha kane ka kynti iakhun dei u Damonlang Pathaw (27’, 44’), bad bynrap lang sa u Nelson Rymbai (6’) bad u Dajiedlang Wanshnong (64’), kaba da kane ka jingjop, joit kan pynlong ia ka Langsning FC ba kan kiew sha ka kyrdan kaba lai ha ka miej iakhein point.

Ha shwa kane ka jingiakhun, kine baroh artylli ki kynhun kim shim la lah ban khur satia ia la ki nam jop ki jong ki, ha ki jigialehkai ba nyngkong hadien ba ka Langsning FC ka la lah ba kan iakhaid da mar shi kol bad ka Mylliem, katba ka Rangdajied ka la lah ba kan iakhaid bad ka Shillong Lajong (0-0).

Ka kol ba nyngkong naka bynta ka Lasngning FC lyngba u Nelson ka long kaba u la khyrwit jam bha kham na jngai ka kol, kaba la pynlong ia u Meshan Banjop rang ap kol ka Rangdajied United um shim la lah shuh ban khanglad ia kane ka bol kaba la sum kum u khnam bad ir ban khih ka jar.

Hadien ba la ioh ban thep ia kane ka kol, ka Langsning FC ka la iai bteng ba kan tynjuh borbah ia ka RUFC, kaba pynlong ia ka ba kan ioh ba kan thep iaka kol kaba ar lyngba u Damonlang.

Satang khyndiat por shwa ba ka jingiakhun kan jam sha ka jingiashong thait, ka Langsning FC ka tehlakam ia kane ka jingiakhun ka, hadien ba ka la ioh ba kan thep ia ka kol kaba lai, kaba la wan hadien ba u Chusrang Sangma u la lah ban pynbuh ia ka bol sha u Damonlang kaba wat hadien ba la buddien da u defender jong ka RUFC, pynban u la ioh ban pynkhih biang pat ia ka jar.

Haba wan ban bteng ia ka kylla miet, ki player ka RUFC ki la pyrshang ban kyntiew ia la ka jong ka rukom ialehkai ka jong ki, ha kaba la don ki khep ba ki player kum ki jong u  Everson Malieh, Benny V Khriam bad Deepson Tokbi ki la ioh ia la ki kabu ksiar ki jong ki tangba kim shim la lah ban pynurlong sha ki kol kaba bunsien ka bol kaba ki ioh ka la shu lait sharud bad  ha ka por ba la pynjlan ia kane ka jingiakhun, ka free-kick kaba la ioh ban shut ruh dain ka la dei beit ia ka diengkol.

Ka kol kaba saw lyngba u Dajiedlang Wanshnong, ia kaba ym slem u la wanphai noh sha ka ben shong (substitute)

Da kane ka jingjop, ka Langsning FC kan khur 4 point na ki arsien ialehkai ba ka la dep, kata ka RUFC ka la lah shwa ba kan khur tang 1 point.

Ka jingiakhun kaban wan jong kane ka lympung ka SPL kan long ga ha ka 27 tarik Nailar, ha kaba ka Laitkor SC kan iakhun pyrshah ia ka Mylliem SC, ha ka por 4:30 nohphai sngi.