Shillong Premier League: Iakhaid ka Langsning bad ka Mylliem

Syllad | The Rising MeghalayaAugust 13, 2025

Ka jingïakhun hapdeng ka Langsning FC pyrshah ïa ka Mylliem SC, ha ka lympung ïalehkai Shillong Premier League ka Shillong Sports Association, ba la long haka 12 tarik Nailar ha SSA Stadium, First Ground Polo, ka la kut noh ha ka jingïakhaid kaba long da mar shi kol.  

Ha shwa ban sdang noh artad kane ka jingïakhun, u slap u la wan ba un ther kaba shi por ka la pynlong ïa ka madan ba kan kham shem shitom ïa ki player ki ar kynhun ban lah ban ïalehkai kumba kidei.

Haba phai sha ka jingïakhun, ka Langsning FC ka la ïoh ba kan pynkhih nyngkong ïa ka jar ha ka minit kaba 48, kaba lah ban ong ba ka dei ka kol kaba la kum bakla ban thep hi da uwei na ki player ka Mylliem sha la ka jong ka kol, ïa kaba ka hadien kane, u Miliancy Khongstia, u la ïoh ïa ka kabu ban khyrwit kham jam bha ïa ka bol kaba la pynkhih beit ir ïa ka jar naka bynta ka Mylliem ha ka minit kaba 75.

Kane kan dei ka sien ba nyngkong ïa ka kynhun ïalehkai ka Mylliem SC ba kan ïoh ba kan ïakhun ha kane ka lympung, haba ïa nujor bad ka Langsning FC ka kynhun kaba la rah teng la arsien ïa ka nam kum ka lahduh.

Hynrei kum ka kynhun, ka la don lang pat ha ka kynhun ïa ki kato katne ki rang ïalehkai kiba la kham rim kum ki jong u Miliancy, u Alem Khongwir, Freestar Kharbangar, Shaibor Nongrum bad Remark Kharmalki, kaba pynwan dur wan dar bha ïa katta ka rukom ban ïalehkai jong ka kynhun ha kane ka lympung.

Haba phai sha ka shi kol ba ka Lansgning FC ka la ïoh ba kan thep ka la wan lyngba u Dajied. Wanshnong, u la lah ban pashat ïa ka bol, ïa kaba uwei na ki player ba ïalehkai shadien ka Mylliem u dang thmu ban head ïa ka sharud, phewse kumba shet ha u dek, ir khih pynban ka jar lajong, kaba pynlong ïa ka Langsning FC ban tam shakhmat da shi kol.

Haba wan ban bteng ïa ka kylla miet, ka sur jong ka jingïalehkai ka la noh sha ka kynhun ïalehkai ka Mylliem, kaba baroh ki player ki jong ka, la ïohi ba ki la ïalehkai shisha naduh ka mynsiem, kaba la plie lad ïa ki ban ïoh bun bha ki kabu ksiar ban pynkhih ïa ka jar, ïa kaba la long lehnohei noh pat namar ka jingbym pat da lah ban da ïa mir bha hapdeng ki player ki jong ka.

Wat la katta ruh, kum ka kynhun, ka Mylliem SC kam lah ban khlem da hun jrut ka mynsiem ban lah shwa wat tang ba kan ïakhaid, hynrei na ka bynta ka kynhun ïalehkai ka Langsning FC, kane ka nam ïakhiaid ka buh ïa ka ha ka jingsngew khia kaba jur, namar kumba ïa tip, kane ka lympung kaba mynta ka snem kan don tang shi kylla.

Ka jingïakhun haka 13 tarik Nailar kan long hadpeng ka Laitkor SC pyrshah ïa ka Malki SC kaban long ha ka por 5:30 janmiet.