Shillong Premier League: Da ka hat trick u Alem, 3 kol jop ka Mylliem ia ka Malki

Syllad | The Rising MeghalayaSeptember 3, 2025

Ka hat trick lyngba u Alem Khongwir ka la biang pura ia ka kynhun ialehkai ka Mylliem SC ba kan khur ia ka lai point ba nyngkong ka jong ka ha ka lympung ialehkai jong ka Shillong Premier League 2025 bad ban lah syndon ban pynliem ia ka Malki SC da 3-0, ha ka jingiakhun kaba la long ha SSA Stadium, First Groud, Polo haka 3 tarik Nailur.

Ka khana jong kane ka jingiakhun ka long ba ka kylla step ka la shu kut shwa khlem da don ba lah ban pynkhih ia ka jar, pynban haba la wan ban bteng pat ia ka kylla miet, u Alem u la ioh ban thep ia kine ki lai tylli ki kol kiba la wan ha ka minit kaba (55′, 64′, 70), kiba long artad ki kol, kiba ibang bad ithiang ban peit, kaba kylla long artad ka hat trick kol ba nyngkong ba u player un ioh ba un thep ha kane ka samoi ialehkai kaba mynta jong ka SPL.

Kumban shu pynkynmaw, kine ki artylli ki  klob, kidei kiba la wan ban kiew na ka kyrdan jong ka First Division, ha kaba ka Malki ka long kum ka lahduh katba ka Mylliem ka la wan ban bat ia ka kyrdan kaba ar (runners up).

Haba wan ban bteng ia ka kylla miet, u sawar ka nam ialehkai ba kham bha u la noh sha ka kynhun ialehkai ka Mylliem, ha kaba lai ngut ki rang ialehkai ki jong ka ba kynthup ia u Remark Kharmalki, Shaibor Nongrum bad Alem Khongwir, ki la kyntiew ia ka rukom ialehkai ka kynhun ka jong ki, katno tam lei lei haba don ki khep ba ki kham pynher sted ia ka rukom ialehkai kaba la buh jingeh bha ia ki rang ka Malki SC.

Ka kol ba nyngkong ba u Alem u la ioh ban thep ka la wan lyngba ka bol kaba la iarap ban pynbuh sha u da u Shaibor bad marsien ioh ia kane ka bol, wut u la rah sted shakhmat bad ha kaba khyllipmat kaba biang bha dain ba un shut kham jam ban pynkhih ia ka jar.

Shiphew minit hadien kane, ka Mylliem ka la ioh ba kan shut ia ka corner lyngba u Remark ha kaba ka bol ka la poi hajan jong u Alem uba la don lypa marjan bha ka kol,  da u la ioh ban head da kaba suk ia kane ka bol, bad ka kol kaba lai ka la wan hadien ba u Alem, u la mareh sted shakhmat bad ban ioh tehlakam ia ka bol bad ha ka khyllipmat kaba biang dain sa shisien un khyrwit jam ia ka bol ban pynkhih ir ia ka jar.

Da kane ka jingjop, ka pynlong ia ka kynhun ialehkai ka Mylliem SC ba kan kiew sha ka kyrdan kaba san, katba na ka liang ka Malki SC, kane ka nam rem jrain ka pynlong ia ka ba kan poi sha u line saw jong ka relegation zone.

Ka jingiakhun haka 4 tarik Nailur, kaba nyngkong jong ka kylla kaba saw (Rd 4) kan long hapdeng ka Rangdajied United FC pyrshah ia ka Nangkiew Irat SC ha ka por 4:30 nohphai sngi.