Shikhung ki jingdawa aiti ka HYC Nongthliew ha u MLA Mairang

Syllad | The Rising MeghalayaNovember 10, 2019

SHILLONG: Ka HYC Nongthliew Circle kala aiti shikhung ki jingdawa ha u MLA jong ka Mairang uba long ruh u Speaker jong ka ïing dorbar thawaiñ ka jylla, u bah Metbah Lyngdoh ha ka jingiakynduh ia u haka 9 tarik une u bnai haka kamra treikam jong u kaba don haka shnong Mairang.

Kine ki mat jingdawa kiba ka HYC kala aiti ha u Bah Metbah kidei kiba kala dawa naduh shuwa ka elekshon 2018 bad kine ki mat dawa ki kynthup:-

• ​Ban kyntiew kyrdan noh ia ka Umthlong Nongthliew Secondary School sha ka Umthlong Nongthliew Higher Secondary School.
• ​Ban kyntiew kyrdan iaka Nongthliew PHC sha ka Nongthliew CHC.
• ​Ban maramot noh iaka surok Laitarted sha Nonglyput kaba la jot rathai.
• ​Ban pynheh noh iaka surok Mawmaram Nongthliew sha Umsaw Khwan.
• ​Ban kyntiew kyrdan noh iaka Mairang Civil subdivision sha ka Districts, bad iaka Districts dei ban ai/khot kyrteng daka “Khatsaw Phra Districts”
• Ban kyntiew iaka Veterinary Aid Health Centre sha ka Dispensary Health Centre.

  

U Bah Metbah ula pynpaw ha khmat ki nongïaialam ka HYC ba ki kam kila ïaid shakhmat ban pynurlong bad pynïoh iaki mat jingdawa bad ula pynpaw ba ki jingdawa kidei kiba shongnia.

Ka HYC Nongthliew ka ap khmih lynti ba u MLA ka thain un lah ban pynurlong ïaki jingdawa ka HYC kumjuh ka jingangnud jong u paidbah ka thain Nongthliew.