Shi bnai ai por u DM ban pyndait CCTV ha ki pharmacy ban khanglad iaki jingdie iaki dawai ba lah ban pyndonkam kum u drok

Syllad | The Rising MeghalayaOctober 18, 2023

Ha kawei pat ka sienjam kaba thmu ban tehlakam halor ka jingpyndonkam drok hapdeng ki khynnah bad ban tehlakam ha kaba pyniaid iew beain, na ka liang u District Magistrate (DM) ka West Jaintia Hills District, u Bah BS Sohliya, IAS, u la pynmih ia ka hukum kaba pyrkhing hapoh ki kyndon ain katkum ka Section 133 CrPC 1973.

Katkum kane ka hukum, ka National Commission for Protection of Child Rights (NCPCR) ryngkat bad ka tnat Narcotics Control Bureau (NCB) kila pynkhreh bad pyllait paidbah iaka Joint Action Plan on Prevention of Drugs and Substance Abuse among Children and Illicit Trafficking.

Kumta ka long kaba kongsan ban shim ia ki sienjam ban peitngor na ka bynta baroh ki dukan die dawai ne pharmacy hapoh ka district kiba die ia ki dawai X lane H drug khlem da ioh ka jingthoh kaba biang na ki doktor.

Kane ka hukum ka la pynpaw ruh ba baroh ki dukan dawai ne pharmacy hapoh ka district kiba dei ia kine ki dawai X lane H drug katkum ka rule 65 (9) (a) jong ka Drugs and Cosmetics Act, 1940 la hukum ba ki dei ban buh ia ki CCTV camera hapoh bad shabar ki dukan jong ki.

Halor kane la ai por shibnai ia ki trai jong baroh kine ki dukan die dawai ne pharmacy ba kin pyndait ia kine ki CCTV camera.

Ia ki dur ki dar lyngba kine ki camera lah ruh ban jurip da ki heh jong ka tnat District Drug Controller Authority / Child Welfare Police Officer ha kano kano ka por.

Lada jia ba kine ki trai jong kine ki dukan die dawai ne pharmacy kim pyntreikam ia kane ka hukum, na ka liang ki tnat ba dei khmih kin shim ia ki lad jingpynshitom.