Shen yn aiti ka MSPB ia ka jingai jingmut sha ka Sorkar ban weng ia ka jingdheng kali ha Shillong

Syllad | The Rising MeghalayaJune 19, 2025

Ka Meghalaya State Planning Board (MSPB) shen kan sa aiti ia ki jingai jingmut sha ka Sorkar Jylla khnang ban lah ban weng ia ki jingeh halor ka jingnangjur ka jingdheng kali ha sor Shillong.

Ha kajuh ka por ka Board ka la aijingmut ruh ia baroh ki kynhun ba kin shim lang kumjuh ia ka jingkitkhlieh ban wanrah ia ki jingkylla kiba kongsan ha ka liang ka pule puthi ha ka jylla.

Haba kren sha ki lad pathai khubor haka 18 tarik Jylliew, u Chairman ka MSPB u Bah Metbah Lyngdoh u la ong ba ka Board ka dang bishar ia baroh ki mat bad ki sienjam ba la shim da ki Tnad bapher bapher kiba iadei bad ki jingpyrshang ban weng ia kane ka jingeh namar ka jingdheng kali ha sor Shillong.

“Ka Board kan sa wanrah ia ki kynja jingai jingmut bad ngin la rah hakhmat ka sorkar ba kan shim ia ka rai khnang ba yn lah ban pyntreikam ia kane hapoh sor Shillong,” u la bynrap.

U Bah Metbah u pyntip ruh ba ka Board dang shen ka la shong bishar bniah ha kaba iadei bad ka liang ka pule puthi da kaba ban jur halor ka jingdonkam jong baroh ki kynhun ban shim ia la ki jong ki bynta ban pynthikna na ka bynta ka jingpynkylla kaba pura ha ka liang ka pule puthi.

“Ngi la iakren sani bha namar ngi sngewthuh shai ba ki don shibun kiei kiei kiba donkam ban leh da ka Tnad. Hynrei, kawei ka mat kaba kongsan hangne ka long ba tang ka sorkar marwei, nga ong ba ka long kaba shem shitom ban wanrah jingkylla. Ngi donkam ban pynthikna ba baroh ki kynhun kin shim ia la ki jong ki bynta khnang ban pynthikna ia ka jingpynkylla kaba pura ha ka liang ka pule puthi,” u la ong.

Haba kdew halor ki jingbatai ba la ai da ka Tnad pule puthi, u Chairman ka MSPB u la ong, “Ki la trei shisha halor ki jingpynkylla kiba donkam ban leh bad baroh kiba ia don bynta ha kane ka kam ki la shimkhia da shisha.”