Shah thang 15 tylli ki trok ka Star Cement hadien ba iap shah iuh kali u samla

Syllad | The Rising MeghalayaMay 18, 2025

Haduh khatsan tylli ki trok kiba pynieng hapoh ka karkhana jong ka Star Cement ha Lumshnong, East Jaintia Hills ki la shah thang ha u paidbhur bym lah ban ithuh haka janmiet sngi U Blei ha kaba ka la mih ruh ka jinghuri hura kaba jur bha na ka daw ka jingiap shah iuh kali jong uwei u samla na Lumshnong hapoh ka phyllaw jong kane ka kompeni.

Ha kane ka jingjia kaba la jia ha ka por kumba 7 baje janmiet bad ba ka jinglong jingman ha kane ka jaka ka dang don hapdeng ka jingsyier.

Haduh mynta hi ym pat lah ban tip ia ka daw kaba thikna halor ka jingshah iuh jong une u samla ha ka trok jong ka Star Cement, kata la ka dei ka jingiuh khnang ne ka jingbakla u nongniah.

Ki khubor ki iathuh ba ka jingiap jong utei u samla na ka jingshah iuh kali ka la pynbitar lep ia ki paidbah nongshong shnong kiba la leit tur beit beit shapoh Star Cement bad thang ia ki khatsan tylli ki trok kiba pynieng ha kane ka karkhana.

Na ka liang ki bor pulit ki la wan poi sha kane ka jaka ban tehlakam ia ka jinglong jingman bad ka jingtohkit halor kane ka jingjia ka la iaid shakhmat.