Shah tar jain ka longkmie na ka jingiakynad ha Maikhuli ba pynkhyllem ia ki nar post

Syllad | The Rising MeghalayaAugust 18, 2025

Ka jingiakynad kaba jur ka la khie kynsan haka 18 tarik Nailar ha ka shnong Maikhuli ha khappud ka Meghalaya Assam hadien ba ki nongshong shnong ki la leit ban pynkhyllem noh ia u nar post ilektrik ba la wan pynieng beain da ka Assam State Electricity Board (ASEB).

Kane ka jingjia ka la pynmih ia ka jingiapyni bor markylliang hapdeng ki nongshong shnong ka Maikhuli na Meghalaya bad ki kynhun na Assam ha kaba bun ngut ki shynrang bad kynthei ki la shah thombor ha ki kynhun na Assam bad don ruh ka longkmie kaba la shah tar jain. 

Katkum ki khubor la iathuh ba ki nongshong shnong ka Maikhuli na Meghalaya ki la leit ban pynjulor noh ia ki nar post ilektrik ba la wan pynieng beain hajan ka pung ha Maikhuli da ka ASEB ha ka por mynstep, bad hadien kane ki la leitphai noh sha la iing.

Hynrei tang hadien katto katne por ka kynhun ki nongshong shnong napoh Assam ki la sdang ban wad ia kito ki briew kiba donkti ha kaba pynkhyllem ia kine ki nar post kaba la pynmih ka jingiania kaba jur bad hadien ka jingiapyni bor markylliang kaba mar met.

Na ka liang ki bor District na baroh ki ar jylla mar ia ioh jingtip halor kane ka jingjia ki la her bran bran sha katei ka jaka ban tem noh ia kane ka jingiakynad bad pynpra noh ia ki paidbah.

Hadien ki heh sorkar na baroh ar jylla ki la rai ban thaw ia ka Peace Committee khnang ban pynneh pynsah ia ka shongsuk shongsain hapdeng ki nongshong shnong kiba shong ba sah ha kane ka thain khappud jong ka shnong Maikhuli kaba dang don ha ka jingiapynbeit pud hapdeng ka Meghalaya bad ka Assam.