Shah sospon u Pulit SI bad 4 ki constable halor ka jingjia shah pynshitom u samla ha Sohra ha thanad

Syllad | The Rising MeghalayaJuly 10, 2025

Ka Tnad Pulit ka Jylla ka la sospon ia uwei u Pulit Sub-Inspector (SI) lem bad sawngut ki langrut (Unarmed Branch) jong ka Sohra Police Station hadien ka jingujor halor ka jingshah pynshitom bein jong uwei u samla 19 snem rta hapoh  thanad.

“Haba shimkhia mardor ia ka jingujor ka Tnad Pulit ka la bthah ia u Sub-Divisional Police Officer (SDPO) ka Pynursla u Bah B Wanswet MPS ba un pynlong ia ka jingtohkit halor katei ka jingjia bad ban aiti ia ka kaiphod. Da kaba pynshong nongrim halor ka jingtohkit bad ka kaiphod ba la aiti haka 9 tarik Naitung, uwei u pulit Sub-Inspector lem bad sawngut ki pulit constable ka Sohra PS ki la shah sospon noh mardor na ka kam bad la sdang ruh ia ka Departmental Proceeding pyrshah ia ki,” ong u Superintendent of Police (SP) ka East Khasi Hills u Bah Vivek Syiem ha u kyrwoh.

“Nalor kata la register ruh ia ka case kam bymman pyrshah ia kine ki pulit ba la shah sospon hapoh Sohra PS Case No.10/2025 U/S 120(1)/3(5) BNS, bad ia ka jingtohkit la pynlong da u ophisar uba ha ka kyrdan Inspector na kawei pat ka Police Station khnang ban pynthikna ia ka jingbym shah liang,” u la bynrap.

Kane ka sienjam ba la shim da ka Tnad Pulit ka la wan jia ruh shisngi hadien ba ka Meghalaya Human Rights Commission (MHRC) kala pan kaiphod na u Superintendent of Police halor kane ka jingjia, haba bthah ban aiti hapoh ka 31 tarik u Naitung.

Na ka liang u SP u pyntip ba ba ha ka 1 tarik Naitung, ki Pulit ka Sohra PS kila ioh pdiang ia ka ejahar na u Rangbah Shnong ka Mawkisyiem, Sohra ha kaba iadei bad ka kam shoh briew, byrngem byrsit  ha ryngkat ki ktien sih ktien sang bad ka jingleh khlem akor  jong u samla Getwin Jyrwa ha Mawap, Mawkisyiem hakhmat kiba bun balang.

Hynrei la ong ba wat hadien ba la khot hajir ia u haduh arsien kynthih da ka Dorbar Shnong Mawkisyiem, hynei u Getwin um shym la wan mih satia.Kumta halor ka jingmudui ejahar la register case pyrshah ia u, bad ha ka 2 tarik Naitung ha ka por kumba 9 baje mynmiet la ioh jingtip ba une uba la shah kynnoh donkti u don ha ka iingsah jong u.

Kumta ka kynhun ki pulit na Sohra PS ki la leit da ka jingthmu ban kem ia u, hynrei une u briew u la phet krad shwa ba kin wan poi. Hynrei, ha ka 3 tarik Naitung ha ka por kumba 11 baje mynstep ka kmie jong u ka Kong Mildred ka la wan ialam ia u sha Sohra PS ha kaba la pyntip ha ka ba yn pyllait noh ia u ha ka por janmiet.

Hadien ha ka por kumba 8:15 mynmiet ka kmie jong u ka la wan poi ha Police Starion bad la pyllait jamin noh ia u hadien ba ka la shem pynban ba u la don hapdeng ka jingmynsaw jur na ka jingshah bom shah tied ha ki pulit.

Kumta ha ka 7 tarik Naitung ka Kong Mildred Jyrwa ka la ujor sha u SP bad sha ka Meghalaya Human Rights Commission (MHRC) da kaba kynnoh ba u khun jong ka ula shah bom shah tied ha ki pulit hapoh Sohra PS haduh ba un da mynsaw jur.

Ka la iathuh ba hadien ba ka la leit ban shwa ia u napoh Police Station ka la pynkit noh ia u shapoh Sohra CHC na ka bynta ban ioh jingsumar hadien ba la pynkynriah pat ia u shapoh Shillong Civil Hospital.

Na ka liang u SP u ban jur ba ka Tnad Pulit ka iengskhem ha ka nongrim ban bat ia ka Ain bad ban pynthikna ia ka jingtrei kam kaba don jingkitkhlieh ha ki kyrdan bapher bapher. Ula ong ba ka Tnad kan leh da kaba tyngeh pyrshah ia kino kino ki dkhot ka Tnad pulit kiba pyndonkam bakla ia ka bor.