Shah pakhang maw ka kali Fire & Emergency Service, ïngkhong khait ka MTC

Syllad | The Rising MeghalayaDecember 13, 2019

JOWAI: Ka kali pynlip ding jong ka Fire & Emergency Service, Jowai kala shah pakhang maw haka por baka thmu ban leit ai jingïarap ban pynlip ding kaba jia hynne ka miet ha ki ar jaka ha Meghalaya Transport Corporation, Jowai depot bad ha kawei ka kudam buh tiar lyngkhot lyngkhai ha Ladthadlaboh hajan ka Rymbai Gas Agency.

Kane ka jingjia pluh ding kala jia haka por kumba 1:20 Am ka por ba ïoh jingtip ka ka Fire & Emergency Service, hynrei ka kane ka kali pynlip ding marsien mih na ophis kala shah pakhang lynti da ki maw ha surok, hajan ka ophis jong ka ha Jowai By Pass.

La suba jur ba kane ka jingshah pakhang lynti jong ka kali pynlip ding ka dei kaba la leh khnang da ki runar ban pynslem ïaki kali ban poi sha ka jaka ba pluh ding.

Ki nongtrei ka Fire and emergency  kila shimkhia ban mih mar mar na ophis ban leit pynïoh jingïarap, pynban marsien mih na ophis kila lap da ki maw kiba la pakhang ha surok bad kila hap ban pynkynriah ïaki maw ban iaid ki kali.

Ki nongtrei jong ka Fire Service kila ïathuh ba  jingshimkhia jong ki paidbah basah marjan bad katei ka Rymbai Gas Agency la lah ban tem ïaka ding, katba ïaka ophis MTC pat kila poi khamslem bad ka ding kaba la klang jur kaba bamduh khoit ïa katei ka iing kaba dei ka iing tin ne iing  kaba la rim.