Shah ñion kylla ki paid nongshong shnong khappud ha u CEM JHADC

Syllad | The Rising MeghalayaSeptember 18, 2019

JOWAI: Dangshen uwei u Waheh Shnong na ki thain khappud ula ong ba ka Jaiñtia Hills Autonomous District Council (JHADC) kadei kaba tlot tam ha kaba kam lah ban ïada ïaka khyndew ka shyiap bad kam lah ban pynthikna ïa u pud u ang jong ka bad katba shaba phai tang ka jingshah lehbeiñ ki paid Khasi Khara ha Khappud Assam Meghalaya.

Hynrei u Chief Executive Member jong ka JHADC haka jingkren jong u haka jingrakhe dap arphew san snem ka Psiar Upper Primary School ula ong ba ki paid khappud ki bam ar maloi, kata naduh ka jingthep vote bad ka jingpdiang ïaki lad jingïarap na ka sorkar Assam bad Meghalaya.

U CEM uba la ïuhkjat haka shnong Psiar haka sien kaba nyngkong eh ula ong ba ka jingïakhun ban ïoh ne wanrah ïaki jaka ba ïakhajia sha ka Jylla kala tlot namar ba ki nongshong shnong kim lah ban pynthikna ïaka jinglong nongshong shnong jong ki, la ki dei ki nong Meghalaya ne Assam.

“Lada ki nongshong shnong ki lah ban pynthikna ïaka jinglong nongshong bad register ïaki jaka jong ki hapoh ka konsil ban ïoh ïaka Land Holding Certificate, shi centimeter ka jaka ruh kan nym leit sha ka Assam,” ong u CEM ma Thombor Shiwat bad bynrap ba lada ki register ïaki jaka jong ki haka konsil shi tyngka ruh kim hap ban siew.

Ula kyntu ruh ïaki Waheh Shnong ban wan sha ka konsil ban wan shim ïaka sanad ban pynskhem ïaka jinglong Waheh Shnong bad kumjuh ruh ban pynbiang ia u pud u sam jong ki shnong ki thaw ban pynsuk ban ïakhun ban ïoh ïaki jaka kiba hap hapoh ka jingiakhajia.

Ha kane ka jingïalang ula pynkynmaw ïaki Dolloi jong ki elaka bapher bapher ban phah ïa u pud u sam jong ki elaka, riti synshar, ki kolshor bad kiwei khnang ba konsil kan ïoh ban buh jingthoh.

“Bunsien nga la ong ïaki nongïalam shnong ban wan register ïaki khyndew ka shyiap, hynrei kine ki nongialam shnong kileh bymsuidniew khamtam ha ki jaka khappud kaba wanrah jingeh iaka konsil ban buh jingthoh ïaki jaka puta,” la ong u Ma CEM.