Shah kem uwei, kurup ka ANTF haduh 10000 ki yaba tablet na Shillong

Syllad | The Rising MeghalayaSeptember 4, 2025

Ka kynhun Anti Narcotics Task Force (ANTF) ka East Khasi Hills ha ka 3 tarik Nailur ka la ioh ban kem noh ia uwei u briew na kane ka nongbah Shillong bad ioh ban kurup haduh 10000 tylli ki dawai kuli pynbuaid-yaba tablet.

Hadien ba la ioh ia ka jingtip kaba thikna ka kynhun na ka ANTF ka la ioh ban bat noh ia kawei ka kali Renault Duster kaba don ia u nombor ML05 R 6828 na ka Sawlad ha ka thain Madanrting.

Haba pynlong ia ka jingtalasi ki pulit ANTF ki la ioh ban kurup noh haduh kumba 6000 tylli ki yaba tablet kiba don ka jingkhia kaba haduh 595.07 gram na ka pla kaba don hapoh kane ka kali.

Namar kane ka jingioh kurup kaba bun ia kaba la shim ba ka dei ka jingthmu ban pyniaid iew, kumta ka ANTF ka la kurup noh ia kine ki tablet bad kem noh ia u trai jong kane ka pla uba kyrteng u Salnang M Sangma uba la phla ba kine ki tablet ki dei jong uwei u briew uba u la pynithuh kum u trai jong kawei ka hotel ha Shillong.

Haba bteng ia ka jingtohkit ka ANTF ka la ioh ban kurup biang sa palat 4000 tylli ki yaba talet.

Halor kane ka jingioh kurup la register case pyrshah ia une u briew, bad na ka liang ka ANTF ka dang pyrshang ban ithuh ia une u trai jong ka hotel bad lehse ia kiwei pat kiba donkti ha ki kam khaii drok.