Shah kem u nongniah trok ka Star Cement

Syllad | The Rising MeghalayaMay 21, 2025

Ki bor pulit haka 20 tarik Jymmang kila kem noh ia u nongniah trok jong ka kompeni Star Cement uba iuh ia uwei nongniah jong ka kali Pick-up uba la khlad noh hashen bad kaba la pynmih ia ka jingjia thombor paidbah kaba triem hapoh ka phyllaw jong kane ka kompeni ha Lumshnong, East Jaintia Hills ha ka janmiet jong ka 18 tarik Jymmang. 

Ka khubor pulit ka ong ba la register case kam bymman pyrshah ia une u nongniah trok ka Star Cement ia uba la tip kyrteng u Sailangmi Dkhar uba dei na ka shnong Khliehtyrshi West Jaintia Hills hapoh Lumshnong Police Station. Une u nongniah trok u don mynta hapoh Judicial Custody. 

Lah ban kdew ba ka jingiap jong utei u samla uba niah Pick-up uba kyrteng u Sngewbha Suchiang 19 snem rta uba dei na Lumshnong ka la wan jia hadien ba ha katei ka juh ka janmiet ka la jia ka jingiatyngkhuh hapdeng kane ka trok ka Star Cement bad katei ka Pickup ha ka surok bah NH-6 hajan ka shnong Wahiajer.             

Ki pulit iathuh ba kane ka trok ka Star Cement ka la phet krad na kane ka jaka hadien ka jingjia kaba la pynlong ia u nongniah jong ka Pick up lem bad kiwei pat ba kin beh thong ia kane ka trok shaduh phyllaw jong ka Star Cement.

Hadien ba la wan poi ha kane ka jaka u nongniah ka Pickup u la kiew ha katei ka trok jong ka Star Cement bad ktah kti ia u nongniah, bad ha ka jingpyrshang ban phet krad bad ban niah shakhmat kane ka trok ka la ioh iuh ia une u nongniah ka Pick up uba la khlad noh hashen.        

Tang hadien khyndiat por kumba 300 ngut ki briew kiba dei na ki shnong ba marjan kiba rah da ki tiar pynmynsaw kynthup ia ki dieng ki maw ki la ialum lang hapoh ka phyllaw jong ka Star Cement bad sdang ban pynjulor ia ka jaka ap pahara, ki kor CCTV bad thombor ia u nongap pahara.    

Kine ki paidbah kiba don hapdeng ka jingbitar ki la khang lynti ruh ban pynkynriah ia ka metiap jong utei u lanot hadien ba la lah ban pynkynriah noh ia u shapoh Civil Hospital, Khliehriat.            

Kine ki paidbhur tang hadien katto katne por ki la thang noh ia kumba 15 tylli ki trok kiba pynieng bad ha kiwei pat ki bynta jong ka Star Cement. Hadien kane la phah mardor ia ka kali pynlip ding, hynrei u paidbhur u la thombor ia ki dkhot pynlip ding jong ka Star Cement bad pyrshang ruh ban pynjulor ia ka kali pynlip ding.       

Na ka liang ki bor pulit ki la pyrshang ban pynsangeh ia u paidbhur, hynrei u paidbhur u la sdang ban ktahkti sa ia ki bor pulit kiba pyrshang ban tehlakam ia ka jinglong jingman bad ban aijingiada ia ki mynsiem briew bad ki jingdon jingem.            

Hynrei da ka jingwan poi shuh shuh ki bor pulit la lah ban tehlakam ia ka jinglong jingman bad ban pynpra ia u paidbah kumjuh ban pynlip ia ka ding kaba klang.