Shah kem u briew ba lehbeijot iaka khunruit ba dang 15 snem

Syllad | The Rising MeghalayaJuly 8, 2025

Ki pulit ki la kem noh ia uwei u briew ba 38 snem rta halor ka jingkynnoh donkti ha kaba leh beijot ia la ka jong ka khunruit kaba dang 15 snem rta haduh ba kan da armet.

U Superintendent of Police ka East Khasi Hills, u Bah Vivek Syiem u la ong ba na ka liang ka kmie jong kane ka khynnah hadien ba ka la shem ba ka khun jong ka, ka la armet kumta ka la tohkit bniah ia ka, hynrei ka la pynpaw ka jingkyndit hadien ba ka la phla ba u panah jong ka u la leh beijot ia ka ha kiba bun ki khep.      

Na ka liang ki pulit ki la register hapoh Mawlai Police Station hapoh ka kyndon jong ka POCSO Act, bad ia kane ka lanot la pynkit noh shapoh Ganesh Das Hospital ban leh shuh shuh ia ki test.

Une u briew uba la shah kynnoh donkti u la shah kem noh ha ki pulit ka Special Cell ka East Khasi Hills na Syad, Umsning, Ri Bhoi District hadien ba u la phetrieh na ki kti jong ka ain mynta la kumba katto katne sngi, ong u une u heh pulit.

Ki pulit ki la pyrshang ban ioh kem ia une u briew naduh ba la register case pyrshah ia u, bad ha ka jingthwet kaba khlem sangeh ki pulit ka Special Cell ki la ioh ban kem noh ia u, u la bynrap.

Katkum ka jingpynpaw da u SP, ki pulit ki dang pynlong ia ka jingtohkit kaba bniah halor kane ka jingjia, bad kin sa shim ia ki sienjam kiba donkam katkum ka ain.

Ia une u briew la pynngat hapoh ka kyndon POCSO Act bad ka Bharatiya Nyaya Sanhita (BNS).