Shah kem u briew ba bom iap ia la ka kurim ha Nongrah

Syllad | The Rising MeghalayaJune 20, 2025

Uwei u briew uba kyrteng u Donald Sohtun u la shah kem noh ha ki pulit ka Rynjah Police Station hadien ba u la shah kynnoh donkti ha kaba pyniap ia la ka jong ka kurim, ka Priya Khongstia hapoh ka iingwai kaba ki shong ki sah ha Nongrah, Nonglum, Shillong.

“Ia une u briew la kem noh hadien ba u la wan pyndem ialade,” ong u Superintendent of Police ka East Khasi Hills, u Bah Vivek Syiem haba kren sha ki lad pathai khubor haka 19 tarik Jylliew.

“Ngi la shim ia kane kum ka Special Report Case bad shen ngin sa Chargesheet halor kane ka jingjia,” u la ong. U SP u la ong ruh ba ha ka jingtohkit la lap ba ka daw kaba lam sha kane ka kam pyniap ka dei halor ka jingsuba ba ka kurim jong u, ka Priya ka don ia ka jingiadei ba rieh nalor jong u.

“Kine ki shi kurim ki la poi sha ka jingiania kaba jur bad dei ha kaba kum kane ka por ba u Donald u la tied ia ka da u maw na ka khlieh bad hadien u la sop ia ka met jong ka da ka blanket bad phet krad noh na kane ka iing kaba ki shong ki sah,” u la ong.

U SP u la ong ruh ba ia ka metiap jong ka la lapdien hadien lai sngi hadien jong katei ka jingjia bad ia ka ejahar la mudui da kiba haiing hasem jong kane ka lanot ha ka 30 tarik u Jymmang ba la dep.

Haba kylli, une u heh pulit u la ong ba ha ryngkat ka kynhun forensic ki la leit sha katei ka jaka ba la jia ka kam pyniap, bad da ka jingiarap jong ki ksew sma dien ki pulit ki la lap ruh ia u maw ba la pyndonkam ha kane ka kam pyniap.

Mynta une u Donald u don hapoh judicial custody.