Shah kem sa uwei u suba donkti ba hakhmat eh halor ka jingbthei bom ha Them Metor

Syllad | The Rising MeghalayaMarch 19, 2024

Ki bor pulit Jylla ki la ioh ban kem noh ia uwei u suba donkti ba hakhmat eh halor ka jingjia bthei bom IED ha Them Metor (Them Iew Mawlong) kaba la jia ha ka miet jong ka 9 tarik mynta u bnai.

“Da ka jingiarap ki bor pulit ka Mairang bad Ri Bhoi District ngi la ioh ban kem ia uwei pat u suba donkti ha ka 18 tarik mynta u bnai. Une u dei uwei na ki suba donkti ba hakhmat eh halor katei ka jingjia pynbthei bom,” ong u Superintendent of Police ka East Khasi Hills, u Rituraj Ravi hynne ka sngi ba Ar.

Une u heh pulit u pyntip ruh ba une uba la shah kem u dei uba don ka jingiadei kaba jan bad ki dkhot jong ka seng kieng atiar Hynniewtrep National Liberation Council (HNLC).

Nalor kata u la ong ba une u briew uba kyrteng u Namphyrnai Lyngdoh Peinlang ba 21 snem rta u dei na ka shnong Peinlang, bad la kem noh ia u na Mairang bad wan kit noh sha Shillong na ka bynta ban pynlong ia ka jingtohkit.

Lah ban kdew ba ha ka 11 tarik mynta u bnai ki pulit ki la kem noh ia uwei u briew uba la tip kyrteng kum u Tarson Lymba uba dei u nongialam jong ka seng HNYF na Dawki, katba ia uwei pat uba la tip kyrteng kum u Ebakordor Nongpluh 26 snem rta la kem na ka thain Malki, Shillong hadien katei ka jingjia bthei bom.

Nalor kata ki bor pulit ki la ioh ruh ban pynpra ia ka tnat treikam barieh ne (Sleeper Cell) jong ka seng HNLC bad pynpulom noh ia ka jingthmu pynbthei bom ha ka nongbah Shillong bad ha sor Nongpoh, bad ki pulit ki la ioh ban kem noh saw ngut napoh Ri Bhoi District.Kine ki dei kiba la tip kyrteng kum u Damanbha Ripnar ba ju khot Shall Lapang, Robinis Ripnar, Jill Tariang bad u Shining Nongrum.

Hadien kane na ka liang ka seng HNLC ha ka 14 tarik mynta u bnai ka la shim ia ka jingkitkhlieh halor katei ka jingjia pynbthei bom IED ha ka miet 9 tarik ha Them Metor bad ai por ruh shi bnai ia ka sorkar ba kan pynkynriah noh mardor ia ki jaidbynriew Harijan kiba shong ba sah ha Them Metor.

Ha kajuh ka por na ka liang u SP u la ong ba ka Tnat pulit ka la pynkhlain bha ia ki bor pahara ha nongbah Shillong bad kumjuh ha baroh kawei ka district.