Shah kem sa ar ngut na Indore ba pynduh pyndam iaki sakhi satar naka pla ka Sonam

Syllad | The Rising MeghalayaJune 23, 2025

Ka kynhun Special Investigation Team (SIT) jong ka tnad Pulit ka Meghalaya, ka la kem sa arngut ki briew ha kaba iadei bad ka jingshah pyniap jong u Raja Raghuvanshi, u nongkhaii na Indore uba la shah pyniap haka por ba wan kai sngewbha sha Sohra.

Kine kiba shah kem ki dei ia u Silome James bad u Balla Ahirwar, ong u SP ka East Khasi Hills u bah Vivek Syiem.

U James, u dei u nongai wai ne property dealer, ula ai wai kawei ka flat sha u Vishal Singh Chauhan, uwei na ki nongshah kynnoh ha kane ka kam pyniap

Ki dur lyngba ka CCTV ka paw ba u James, ula sei ia kawei ka pla, kaba dei ka jong ka Sonam Raghuvanshi, ka kurim u Raja na katei ka flat, hadien ba ki la shah kem. U James u la shah kem katba u dang pyrshang ban phet sha Bhopal, u la ong.

U Ahirwar u dei u nongap pahara ha katei ka iing kaba don kane ka flat. La suba ba u don ia ki jingtip kiba kongsan kiba iadei bad katei ka kam bad la ngeit ba u la aiti ia katei ka pla sha u Silome James, u la bynrap.

Ka jingtohkit jong ki pulit ka la pynpaw ba ka Sonam Raghuvanshi ka la sah ha katei ka flat shwa ban shah kem, bad katei ka pla ka don ia ki sakhi kiba kongsan, kynthup ia ka laptop, ka pisa tyngka, ki jingdeng ksiar, bad ka pistol kaba la kynnoh ba la thied da u u baieid jong ka, u Raj Kushwaha.

Baroh arngut u James bad u Ahirwar la kynnoh ba ki la pynduh pyndam ïa ki sakhi sabut ba kongsan bad yn rah iaki hakhmat ka ïingbishar ha Indore ban pan transit remand ban wanrah sha Shillong ban tohkit bniah, ong u SP.

Da ka jingioh kem ia kine ki ar ngut, baroh kiba shah kem ha kane ka kam pyniap kala kot sha ka hynniew ngut, ba kynthup ïa ka Sonam Raghuvanshi, kaba pyndem ialade ha ki pulit ha Uttar Pradesh ha Ghazipur district ha ka 8 tarik u Jylliew.

Ka jingtohkit ka dang iaid shakhmat, ha kaba ki pulit ki dang wad bniah ban lap ia kiwei kiwei kiba donkti