Shah kem saw ngut kynthup uba pynbthei bom IED ha Khliehriat namar ka kam dawa pisa jubor

Syllad | The Rising MeghalayaAugust 23, 2023

Saw ngut ki briew kynthup ia uwei uba la shah kynnoh donkti halor ka jingjia pynbthei bom IED kaba la jia ha u snem 2021 hapoh Khliehriat Police Reserve ki la shah kem noh halor ka jingdonkti ha ka kam dawa pisa jubor lyngba ka phone.

Na ka liang u Superintendent of Police ka EJHD, u Jagpal Singh Dhanoa IPS ula iathuh ba ha ka 19 tarik mynta u bnai hadien ba ki la ioh ia ka jingtip kaba bniah halor ka jingdon jong uwei u nongshong shnong ka Lumshnong uba la shah dawa pisa jubor lyngba ka phone ha u briew u bym lah ban ithuh da kaba byrthen ruh ia ka jingim jong u.

Kumta ha ka 21 tarik mynta u bnai na ka liang ki pulit ki la buddien ia une u briew uba shah dawa pisa bad ha ka por kumba 3 baje janmiet la shem ba u la pynieng ia ka kali hapoh Dosti Hotel Ladrymbai hadien ba arngut ki suba ki la rung hapoh ka kali jong u. Hadien kane mardor na ka liang ki pulit ki la ioh ban kem noh ia kine ki arngut ia kiba la tip kyrteng kum u Daruis Pakem 19 snem rta uba dei na Moolaitbri Sumer, East Jaintia Hills, katba ia uwei pat la buhrieh noh ia ka kyrteng namar u dei uba dang rit ka rta.

Hadien ka jingtohkit, kine ki arngut ki la phla ba ki la lum pisa na ka bynta uwei u briew uba kylla long paralok lyngba ka Facebook. Kumta ruh ha ka 22 tarik mynta u bnai ha ka por kumba 6 baje janmiet, ki pulit ki la ioh ban kem noh ia uwei u briew uba kyrteng u Issei Sungoh uba dei na Dkhiah East (Ladsutnga) napoh ka iingsah jong u.

La shem ruh ba dei une u briew uba dawa pisa lyngba ka phone na utei u lanot, bad la shem ruh ba ula ialong paralok bad kitei kiba la shah kynnoh donkti lyngba ka facebook hadien ba u la hukum ia ki ba kin leit shim ia ka pisa kaba la dawa na utei u lanot.

Na ka liang u SP u la ong ruh ba u Issei Sungoh 29 snem rta u dei uba la shah kem teng ha ki pulit ka East Jaintia kum uwei na kiba shah kynnoh donkti hakhmat eh halor ka jingjia bthei bom IED hapoh Khliehriat Police Reserve ha u snem 2021, ia uba hadien la pyllait jamih noh da ka kashari.

Haduh bala thoh iaka khubor saw ngut kiba shah kem halor kane ka kam dawa pisa, ar ngut ki dei kiba dang rit rta.

Halor kane ka jingjia ba dang shen la rejistar case pyrshah ia kitei ki laingut hapoh Lumshnong PS bad ka jingtohkit ka la iaid shakhmat.