Shah kem arngut ki koidi ba lait phet na Civil Hospital, Nongpoh na Goalpara, Assam

Syllad | The Rising MeghalayaJune 4, 2025

Arngut ki koidi kiba la lait phet na Civil Hospital, Nongpoh naduh ka 15 tarik Naiwieng 2024 bad shong riehtngen ha Goalpara district ka Assam da ki kyrteng kiba ai thok ki la shah kem noh ha ki bor pulit ka jylla.

Uwei na kine ki runar uba kyrteng u Sunil Das 29 snem rta uba dei na Dudnoi District ka Goalpara Assam uba la lait phet napoh Civil Hospital, Nongpoh ha ka 15.11.2024 u la shah kem noh ha ka 29 tarik Jymmang 2025 ha ki pulit ka Ri Bhoi da ka jingiarap da ki bor pulit ka North Garo Hills.

U Sunil u la shah rai pynrem nyngkong halor ka Nongpoh PS Case 48(03)2022 u/s 224 IPC bad ula pyndep iaka jingshong hapoh along haka 22.04.2023.

Ula shah rai pynrem biang halor ka case katkum ka Nongpoh PS Case No. 07(12)2018 u/s 5(l)(m)(n)/6 of POCSO Act da kaba shah rai set phatok shi jingim. U dang don hapdeng ka jingshah tian bishar halor kane ka kam bymman ha ka por ba u la ioh ban phet krad.

Kumjuh uwei pat u runar (UTP) uba kyrteng u Pappu Chettri 32 snem rta uba dei na ka shnong Mawsyntai, Nongpoh-Ri Bhoi uba la shah pynngat hapoh Nongpoh Women PS Case No. 59(10)2019 u/s 341/363/376(2)(I) IPC bad uba la lait phet na Civil Hospital, Nongpoh ha ka 15.11.2024 u la shah kem noh haka 3 tarik Jylliew da ka jingiarap jong ki bor pulit ka North Garo Hills.

Ia u Sunil Das ka dep ban phah sha phatok katba ia u Pappu Chhetri ka kynhun ki pulit ka Ri Bhoi ki dang don ha ka lynti na Goalpara ban ialam ia u shapoh ka iingkashari ha Nongpoh haka 4 tarik Jylliew.