Shah kem 5 ngut ki nongtuh thuk thuk na Pynursla, ioh kurup artylli ki thuk thuk R15

Syllad | The Rising MeghalayaApril 22, 2025

Ki pulit ka East Khasi Hills ki la ioh ban kem noh ia san ngut ki nongtuh thuk thuk bad ioh ban kurup noh ia artylli ki thuk thuk R15 kiba la shah rong tuh na Sunny Hill bad na 3rd Mile Upper Shillong haka step sngi ba Ar.

U Superintendent of Police ka East Khasi Hills, u Bah Vivek Syiem u pyntip ba kane ka jingioh kurup ka la wan long hadien ba ki pulit pahara ki la pynlong ka jingpynap shrip ha kiba bun jaka ha ka por mynmiet. Ia ka thuk thuk kaba la shah rong tuh na 3rd Mile la iehnoh ha Sangmein katba ia kawei pat ka thuk thuk la lapdien na ki pulit na ka thain Pynursla.

Uwei napdeng kine ki nong tuh thuk thuk u la lait phet krad katba uwei pat uba kyrteng u Nironton Tangsong 24 snem rta uba dei na ka shnong Mawryngkang u la shah bat noh.

Haba buddien ia kane ka jingjia, ki pulit ki la ioh ban kem noh sa ia sawngut kiwei pat ia kiba la tip kyrteng kum u Pius Talang (19) na Pyrdiwah, u Lovingstar Surong (18) na Pynursla, u Balajied Mawiong(19) na Sohlong, Pynursla bad u Banpynskhem Mukhim (19 snem rta) na Pynursla.

Kane ka kynhun runar ka dei kaba donkti ha kiba bun tylli ki jingjia shah tuh thuk thuk bad ia kiba yn ialam hakhmat ka iingkashari haka 23 tarik Iaiong, ong u heh pulit.