Shah kem 5 ngut ba tuh ia ki tiar ba T.43 lak na ka trok ba ioh kurup na West Jaintia Hills

Syllad | The Rising MeghalayaMay 15, 2025

Ka kynhun ki pulit ka East Guwahati na Basistha PS, Assam ki la ioh ban kem noh ia san ngut ki briew kiba donkti halor ka jingshah tuh ki tiar kiba shongdor haduh T.43 lak ia kiba la pynkit da ka trok kaba don ia u nombor AS26AC0874 ha ka lynti na Guwahati sha Silchar kaba la jia ha ka 28 tarik u Iaiong ba la dep ha kaba ki la ioh ruh ban kurup noh ia kane ka trok na West Jaintia Hills District.

Ki pulit ki iathuh ba hadien ka jingioh pdiang ia ka jingujor halor ka jingpyndonkam bakla da u nongniah jong ka kali bad ki paralok jong u, ki pulit ki la pynlong ia ka jingtohkit bad ioh ban kem noh ia arngut ki nongtuh kali ba la bna nam na ka thain Khanapra ia kiba la tip kyrteng kum u Ekram Hussain ba ju khot sin Imran (22) bad u Hafizur Miya (27 snem rta).

Ki pulit ki iathuh ruh ba ka jingtohkit ia kine ki arngut ki runar ka la pynlong ba kin bteng ia ka jingkhynra ha ki bynta jong ka Saradiya bad Barpeta ha kaba ki la ioh ban kem sa arngut kiwei pat kiba la shah kynnoh donkti ia kiba la tip kyrteng kum u Babul Hoque (27) bad u Jiyarul Islam (29 snem rta).

Haba pynshong nongrim na ka jingmih na ka jingtohkit ia kitei ki mar kiba la shah tuh la lapdien na Shillong, ha kaba la ioh ban kem sa ia uwei pat uba donkti uba kyrteng u Rakesh Kumar Mahato (33 snem rta). Ki pulit ki iathuh ruh ba ia ka trok kaba la shu iehnoh la lapdien na Ialong Tollgate, Jowai.

Ki pulit ki iathuh ba kine ki tiar ba la ioh kurup ki kynthup ia 3 tylli ki top ba 210 litar, hynriew tylli ki Crompton fans, 283 synduk ki mar jingtah jingsleh, 50 borti ki lubricant urea, 12 tylli ki jain readymade, 2 synduk ki tiar bording, 3 synduk ki mar ka kompeni Dabur, 67 synduk ki colgate bad kiwei kiwei.