Shah kem 4 ngut kiba donkti ban tuh ia ki tiar jong ki nongwan shangkai na Mumbai

Syllad | The Rising MeghalayaJune 24, 2025

Ki pulit Special Party ka Madanrting Police Station haka sngi Nyngkong ki la ioh ban kem noh ia sawngut ki briew halor ka jingkynnoh donkti ha kaba tuh ia ki mar ki mata napoh ka kali jong ki nongwan shangkai na Mumbai na ka thain Mawblei.

Kine ki nongtuh kiba la shah kem noh ki dei kiba la tip kyrteng kum u Chaphrang Nangkiew Sutnga 24  na Mawblei, u Wanjop Kharumnuid 23 na Laitkor Nonglum, u Albertstar Kharhujon 22 na Umphyrnai bad u Michael Nongrum 45 snem rta na Demthring Block A.

U Superintendent of Police ka East Khasi Hills, u Bah Vivek Syiem u pyntip ba kane ka jingjia ka la jia ha ka janmiet jong ka 22 tarik Jylliew ha ka por kumba 8 baje katba kine ki nongwan shangkai kiba kynthup ia u Jay Nand Kishore Joshi lem bad kiba haiing hasem jong u nalor kiwei pat ki shijur kiba dang shu pyndep ia ka jingiathoh shongkurim kiba dei na Mumbai ki dang pynieng ia ka kali Innova jong ki hajan Mahindra Showroom bad leit bam ja miet ha ka By the Way Restaurant.

Hadien ba ki la wanphai kine ki briew ki la shem ba ka jingkhang iit jong ka kali ka la pait bad ka synduk jong ki kaba don ia ka pisa T.50,000 nalor kawei ka iPhone 13 ki la shah tuh.

Na ka liang ki pulit ki register ia kane ka jingjia hapoh Madanrting Police Station, bad hadien kane ki la pynlong ka jingthwet kaba jur bad tang hapoh ka 24 kynta ki pulit ki la ioh ban kem noh ia kine baroh sawngut na ka thain Mawblei bad ioh ban kurup noh ia ka pisa, ka iPhone lem bad ki tiar ki tar.