Shah kem 3 ngut ki nongtuh kali, ioh kurup 3 tylli ki ar shaka ba shah tuh ha West Jaintia Hills

Syllad | The Rising MeghalayaAugust 23, 2025

Lai ngut ki nongtuh kali ki la shah kem noh hadien ka jingioh kurup ia lai tylli ki ar shaka ba shah tuh na ka jaka khlaw ha ka shnong Demthring, West Jaintia Hills haka step 22 tarik Nailar.

U Superintendent of Police ka District, u Jagpal Singh Dhanoa u la ong hadien ba la ioh ia ka jingtip kaba thikna, ki pulit ba kyrpang na Jowai DEF hapoh ka jingialam u Additional Superintendent of Police, u Bah Jason Myrom ki la pynlong mardor ia ka jingkhynra ha ki bynta jong ka thain Demthring ha kaba ki la ioh ban bat noh ia kawei ka kali Alto K10 kaba kit ia ki bynta jong ki kali ar shaka.

Haba pynlong ia ka jingtohkit ia ki briew kiba don hapoh kane ka kali haka juh ka jaka kala pynlong iaki pulit ban lapdien ia lai tylli ki Yamaha Cygnus Ray ZR kiba don ia u No. ML05V 4471, ML05Y 5008 bad ML05AC 0799 ia kiba la buhrieh ha ka jaka khlaw kaba don marjan.

Kine ki laingut kiba la shah kem noh ki dei kiba la tip kyrteng kum u Jopparson Rabon (24) bad u Meshanki Langstang (22) kiba dei na Thangrain bad u Paulme Sungoh (21 snem rta ) uba dei na Wahnangbah lawmusiang.

Ki pulit ki la lap ia u Rabon katba u dang niah ia katei ka kali Alto K10 ka bym don nombor plate katba u Meshanki u la shong kum u passenger katba ia u Paulme la ioh bat na katei ka jaka khlaw hajan Demthring ka jaka ba la ioh kurup ia kine ki kali ar shaka ba la buhrieh.

U SP u pyntip ba hadien ka jingtohkit bniah kine ki runar ki la phla ba ki la tuh ia kine ki ar shaka na ka thain Laban bad Jhalupra, Shillong. U la ong ruh ba ia kine ki ar shaka kumjuh ia kane ka Alto ba la pyndonkam ha kane ka kam bymman la kurup bad wanlam noh shapoh Jowai Police Station na ka bynta ban pynlong shuh shuh ia ka jingtohkit