Shah kem 3 ngut ki nong Bangladesh na ki bynta khappud ka WJH; ioh kurup lieng na EKH

Syllad | The Rising MeghalayaAugust 21, 2024

Ki shipai Border Security Force (BSF) ka Meghalaya ha ka 19 tarik Nailar ki la lah ban pynpulom noh ia ka jingthmu wan rungtuh jong ki briew napoh Bangladesh bad ioh kem noh ia laingut na ki bynta khappud jong ka ri na West Jaintia Hills.

Kine ki laingut ki nong Bangladesh kiba la shah kem noh ki kynthup ia arngut ki shynrang bad kawei ka kynthei nalor laingut kiwei pat ki nong India kiba iarap ban btin lynti ia ki.

Hapdeng ka jinglong jingman kaba synjor hapoh ka ri Bangladesh hadien ka jingiakhih paidbah kaba dang shen, na ka liang ki shipai BSF ki la pynjur ia ka jingpahara ha baroh ki jaka khappud ka India-Bangladesh khnang ban khanglad ia ka jingwan rungtuh jong ki briew kiba na bar bad ban pynthikna ia ka shongsuk shongsain hapoh ka ri.

Ia kine ki nong Bangladesh kiba la shah kem kynthup ia ki paralok nong India jong ki la aiti noh sha ki bor pulit ba kin leh shuh shuh ia kaba donkam. 

Katba ha ka 18 tarik, ki BSF ki la ioh ban kurup noh ia shibun bah ki jingtah jingsleh, ki jain ki nep kiba kot sha ka T.58 lak ia kiba la thmu ban shalan beain shapoh Bangladesh lyngba ki jaka khappud ka ka thain Pynursla, East Khasi Hills.  

Hynrei ki runar kiba donkti ha kane ka kam ki la ioh ban phet krad noh mar ia iohi ia ki shipai BSF da kaba shim kabu ia ka jinglong jong ka mariang bad ka jingdum jong ka bneng. Hadien ki shipai ki la aiti noh ia kine ki tiar ba la ioh kurup sha ka tnad custom ban leh ia kaba donkam.  

Ha kawei pat ka jingkhynra ki BSF ki la ioh ban kurup noh ia artylli ki lieng kynda bad sawtylli ki lieng steel jong ki nong Bangladesh napoh Umiam (Wah Shella) katba ki dang pyrshang ban wan jam sha u pud u sam jong ka India na ka bynta ban wan tuh maw.