Shah kem 3 ngut ki kynthei Manipur, kurup ia u drok ba T.4 klur na East Jaintia Hills

Syllad | The Rising MeghalayaAugust 18, 2025

Ka kynhun Anti-Narcotics Task Force (ANTF) ha ryngkat ki pulit ka East Jaintia Hills District ki la ioh ban kem ia laingut ki suba nongkhaii drok ba shyrkhei kiba dei ki kynthei bad ioh kurup ia u drok heroin uba shongdor haduh palat T.4 klur.

U Superintendent of Police ka EJH u Vikash Kumar, IPS ha u kyrwoh u la ong ba ha ka miet 16 tarik Nailar ha ka por kumba 11 baje mynmiet, ka ANTF bad ki pulit ka EJH ki la ioh jingtip ha kaba iadei bad ki laingut ki suba nongkhaii drok kiba dei ki kynthei kiba wan ha ryngkat u drok na Churachandpur, Manipur sha Shillong da ka kali paidbah.

Kumta mardor ki la pynlong ka jingpynap shrip hapoh Umkiang Patrol Post kaba hap hapoh Lumshnong PS, bad ha ka por kumba 11 baje mynstep jong ka 17 tarik Nailar kane ka kynhun pulit ka la bat noh ia kawei ka kali Maruti Suzuki S-Presso bad bat noh ia kine ki lai ngut ki kynthei kiba la tip kyrteng kum ka Kimnei (33), ka Dimkhothing (47) bad ka Ngaiting (40 snem rta), baroh kiba dei na ka shnong Khongjom kaba hap hapoh Tengnoupal PS jong ka jylla Manipur.

Ha ryngkat ka jingiadon lang ki sakhi ba laitluid la pynlong ia ka jingtalasi hapoh ka kyndon 50 jong ka NDPS Act, ha kaba la ioh ban kurup noh ia ki saw tylli ki pla kiba don haduh 80 tylli ki synduk sabon ba la thep ia u drok heroin uba khia haduh 961.33-gram bad uba shongdor haduh palat T.4 klur haka iew beaiñ ka pyrthei.

Une u heh pulit u la ong ba kine ki kynthei la suba jur ba ki dei ka bynta jong ka kynhun runar khaii drok kaba heh bha na kawei ka jylla sha kawei pat bad kaba ju pynpoi ia u drok na Manipur sha Shillong bad sha kiwei pat ki bynta jong ka ri India.

Hadien la register case pyrshah ia kine ki lai ngut hapoh Lumshnong Police Station ha ki kyndon ka NDPS Act bad ka jingtohkit ka dang iaid shakhmat ban lapdien shuh shuh ia kiwei pat ki briew kiba donkti.

Nalor kata la kyntu ruh ia kino kino ki briew kiba don jingtip ha kaba iadei bad kiwei pat ki runar kiba donkti ha kane ka kam bymman ba kin pyntip mardor sha ki police station ha kaba yn buhrieh ia ki kyrteng jong ki bad ban ai khusnam ruh.