Shah jied u Halen Nongtdu kum u Youth Ambassador AFC-Aurora eGoal programme

Syllad | The Rising MeghalayaOctober 12, 2020

U Halen Nongtdu, u player ialehkai ka Ri India u ba la pynkhreh ialade ban mihkhmat sha ka AFC U-16 ula shah jied kum u Youth Ambassador jong ka AFC-Aurora eGoal programme na ka bynta South Asian Zone. 

Ka eGoal Programme kaba hap hapoh ka Aurora’s Model, ka thong jong ka long ban kyntiew ïaka ka sap ïalehkai jong ki khynnah samla bad ban wanrah ïaka bha ka miat haka imlang sahlang bad lyngba ka eGoal Programme ka ai rynsan ïaki samla ba kin ïasaid bad ban don ka jingkitkhlieh haka kam ïalehkai phutbol.

Hapoh ka Asian Football Confederation (AFC) la don Artylli ki Zone ka South Zone bad Central Zone ha kitei ki artylli ki Zone la don 12 tylli ki ri kynthup ïaka ri Bangladesh, Bhutan, India, Maldives, Nepal, Pakistan, Sri Lanka, Afghanistan, Islamic Republic of Iran, Kyrgyz Republic, Tajikistan, Turkmenistan, bad Uzbekistan.

Man kawei ka ri la jied 3 ngut ki khynnah samla kynthup kynthei bad shynrang kiba hapoh 18 snem rta bad ha India la jied ïa u Halen Nongtdu bad arngut ki ‘thei ialehkai ka ri ne National Team, ka Sai Sankhe bad ka Aveka Singh.

“Ka long ka jingkyrkhu bah ïa nga bad nga ai khublei kyrpang ïaki nongpynïaid kiba la jied bad ibit ïa nga ban long uta u brand Ambassador ne nongrah khubor jong ka ri”, ong Halen Nongtdu.

Ula iathuh ba ha eGoal programme la don 9 tylli ki subject kynthup ka Sport for Development and Peace, Sustainable Development Goals, Philanthropy in Football, Diversity and Inclusion, Safeguarding and Child Protection, Civic Engagement and Ethical Volunteering.

Napdeng ki 9 tylli ki subject 3 tylli la dep ban batai lyngba ka Online da ki briew jong ka UNESCO.