Shah jied ka Alisha Lyngdoh na East Jaintia Hills bad ka Bonifilia na Shillong ban mihkhmat iaka India ha ka SAFF U-17 sha Bhutan

Syllad | The Rising MeghalayaAugust 18, 2025

Da ka jingsngew sarong ka Meghalaya ka la sakhi ia ka jingioh leit iashim bynta jong ki arngut ki thei ialehkai football napdeng ka kynhun jong ki 23 ngut ki nongialehkai ka kynhun na India ka ban leit ia aireng sha ka lympung SAFF U-17 Women’s Championship ka ban sa long shen ha Bhutan.

Kine ki arngut ki thei ialehkai na Meghalaya ki kynthup ia ka Alisha Lyngdoh na East Jaintia Hills kaba la shah jied kum ka nongialehkai ba shadien (Defender) bad ka  Bonifilia Shullai na Shillong kum ka nongialehkai hapdeng (Midfielder).

Ka jingtrei shitom bad ka jingaiti lut jong ka Alisha ka la plie ia ka lad ban ioh rung sha ka kynhun ialehkai jong ka Ri bad kaba la pynurlong shisha ia ka jingangnud ka jong ka ban ioh mihkhmat ia ka ri India sha ka lympung jong ka pyrthei.

Ka East Jaintia Hills District Football Association (EJHDFA) ka la pynpaw ia ka jingsngew sarong kaba khraw halor kane ka jingjop ka jong ka bad ai ruh ka jingkitbok kitrwiang na ka bynta jong ka bad ka ban long ka burom kaba khraw ia ka District bad ka Jylla hi baroh kawei.

U Rangbah ka Jylla u Conrad K Sangma lyngba ka rynsan social media jong u u la ong, “Ka long ka jingsngew sarong ban iohi ia ka kyrteng jong ki arngut ki nongialehkai na Meghalaya ha ka thup jong ki 23 ngut ki dkhot ka kynhun jong ka ri India na ka bynta ka lympung ialehkai South Asian Football Federation (SAFF) U-17 Women’s Championship ka ban long ha Bhutan. Ka jingkhublei bad ka jingkitbok kitrwiang na ka bynta ka Bonifilia Shullai kaba dei ka Midfielder na Shillong bad ka Alisha Lyngdoh ka Defender na East Jaintia Hills.To ngin ia ai mynsiem ia ka kynhun India.”

Ka kynhun ialehkai ka India ka ban leit ia aireng sha kane ka lympung ka kynthup ia ki nongap kol, ka Munni, Surajmuni Kumari, bad ka Tamphasana Devi Konjengbam; ki defender ka Alena Devi Sarangthem, Alisha Lyngdoh, Binita Horo, Divyani Linda, Elizabed Lakra, Priya, Ritu Badaik bad Taniya Devi Tonambam, ki midfielder ne nongialehkai pdeng Abhista Basnett, Anita Dungdung, Bonifilia Shullai, Julan Nongmaithem, Pritika Barman, Shveta Rani bad ka Thandamoni Baskey; ki thei ialehkai shakhmat ki kynthup ia ka Anushka Kumari, Nira Chanu Longjam, Pearl Fernandes bad ka Valaina Jada Fernandes.