Shah jied arngut ki nongiasiat khnam ka WJDSA

Syllad | The Rising MeghalayaDecember 8, 2024

Arngut ki nongsiat khnam na ka shnong Nangbah, West Jaintia Hills District kila shah jied ban shah hikai pyntbit siat khnam kaba la tip kum ka Archery Indian Round Category.

Kine ki arngut kila shah jied hadien ba kila pyndep iaka trial ne ka jingpyrshang kaba shisngi ba la pynlong da ka West Jaintia District Sports Association (WJDSA), ha madan Kiang Nangbah Stadium, Jowai haka 7 tarik Nohprah.

Kine ki arngut ki long ka Heigenica Lamare na Nangbah Mulang bad Wanbok Dhar na Nangbah Pohshnong.

Ha kane ka Trial la wan shim bynta 20 ngut ki nongiasiat khnam ka West Jaintia Hills District.

Ka thong jong ka Trial ne ka jingpyrshang ka long na ka bynta ban ioh jied iaki nongsiatkhnam naka bynta ka Meghalaya Games 2025 ka ban long ha Jowai-Wahiajer, West Jaintia Hills District.

U President WJDSA Ma EMH. Passah ula ong ka Archery ne ka jingsiat khnam kadei ka jingialehkai tynrai jong u khun Khasi Jaintia naduh u mynbarim.

Ha kaba iadei bad ka jingialehkai, ula pyntip ba ka West Jaintia ka don shibun ki khynnah kiba don ka sap siat khnam bad ban nangkyntiew shuh shuh ia kane ka jingialehkai naka liang ka WJDSA kala pynthied hi iaki tiar ki tar katkum ka juk mynta ban plie lad bad pynsuk iaki khynnah ban pyrshang ne praktis.