Sha u EE-PWD ujor u rangbah halor ka jingsniew ka surok Lakadong sha Hingaria ha East Jaintia Hills

Syllad | The Rising MeghalayaAugust 24, 2024

Uwei na ki riew rangbah ba pawkmat ka thain East Jaintia Hills, u Bah Marshall SB Biam u la phah da ka jingthoh sha u Executive Engineer PWD (Rds), NEC Division, Khliehriat East Jaintia Hills District halor ka jingsniew palat ka surok naduh Lad Lakadong sha Borkhat Natbor, Pdieng Wahkhriem Demlaang, Kwator shaduh ka shnong Hingaria, kaba la wanrah ia ka jingeh kaba khraw ia ki paidbah nongleit nongwan khamtam ia ki nongshong shnong jong ka thain hi baroh kawei.  

Ha kane ka dorkhas u la ong ba ha kine ki khyndiat bnai ba la dep la sakhi ia ka jingjur slap hapoh ka thain bad kaba la nangpynjulor shuh shuh ia baroh ka shilynter jong ka surok kat haduh ba ki la mih satang ki thliew ki syar.              

U la ong ruh ba ka jingpyniasoh ha ka leit ka wan bad ka kit ka bah lyngba kane ka surok ka la ktah jur ia ki paidbah babun balang khamtam ia ki nongshong shnong jong ka thain kiba hap ban iaid lyngba na kawei ka shnong sha kawei pat khamtam lei lei  haba jia ka pang ka shitom bad kaba ju wanrah ruh hateng ia ka jingjia ba sngewsih.        

Nalor kata u la pynpaw ruh ba la bunsien ki la leit mih sha ki bor sorkar kumjuh sha ki heh ka tnat PWD ka East Jaintia Hills kiba dei khmih na ka bynta ka jingshna bad maramot ia kane ka surok, hynrei kam shym la don satia kano kano ka jingshim khia na ka liang ka jong ki, kata wat hadien ba la bteng ban pynpaw ruh lyngba ki lad pathai khubor.       

“Kumta halor kane ka bynta ngi kyntu jur ia ka Sorkar bad ka tnad ba dei khmih ba ki dei ban shim mardor ia ki sienjam ban shna bad maramot ia kane ka surok khlem da pynslem shuh, bad lada ka sorkar kam shimkhia halor kane ngim banse ban shim da kiwei pat ki sienjam,” u la bynrap.