Sha ka Liang Jongno u don u Bah PT Sawkmie?

Syllad | The Rising MeghalayaSeptember 12, 2020

Haba pule bad sngap ïa ki lad pathai kotkhubor, nga sngew bira-biri shisha haba sakhi ïa ki jingkren jong u Bah PT Sawkmie ha kine ki khyndiat sngi.

Ha shuwa ba ngan ryngkang shata, ngan kyrtiang dien shuwa khyndiat sha ki por ba la leit noh.

Nga kwah ban pynkynmaw ba u Bah Sawkmie u la jop ïa ka ilekshon MLA ha ka sien ba nyngkong duh ha u snem 1998. U la ïai jop kynthih tat haduh ka jingrem noh ka jong u ha ka ilekshon 2008. Ha ki shiphew snem ba u la long MLA, u la kylliang parti thik kumba kylliang jaiñ u tyngshop ba shad ha ka phlim dkhar. Hadien ba u la rem ha u 2008, tharai ha ka jingbitar, u la ieh noh ïa ka Mawlai ban leit ïakhun pyrshah ïa u radbah ka Pynthorumkhrah, U Bah AL Hek ha u 2013. Hadien ba u la shah rem, u la leit phai biang sha Mawlai bad jop ha ka ilekshon MDC kum u kyrtong jong ka seng saiñ pyrthei, ka KHNAM. Ha uto u snem, baroh ki MDC ka KHNAM ki la ïa smai paidbah ba kin ym ïa phet seng. Ki para MDC ha kato ka por la kynthup ïa u Bah Rit Adelbert Nongrum. Phewse, u Bah PT u la kylla jutang tang hadien katto katne por, bad leit ïasnoh kti lang bad kiwei ki seng saiñ pyrthei.

Mynta pat, hadien ba u la jop biang na Mawlai kum u MLA ha u 2018, kum u kyrtong jong ka seng Congress, u la kren bun kiei kiei ha dorbar thawaiñ bad shabar jong ka ruh. Tangba ki don ki jingkren ki jong u kiba pynsuba ïa nga ba une u rangbah, u la dait ki kti ki kjat ban ryngkang dieng kper biang.

Ha u bnai Ïaïong mynta u snem, u Rahul Gandhi u la thap khlieh tharai lada u la ïoh sngew ïa ka jingïaroh ba la theh da u Bah PT halor u Myntri Rangbah Duh ka Ri India, u Narendra Modi. U Bah PT u la pyntuid ki ‘tien ïaroh namar ba uta u Modi u la ‘treishitom’ bad ba u tbit ‘ka rukom treikam’. Na kawei pat ka liang ngi ïohi kumno ba u Rahul Gandhi bad kiwei ki nongïalam ka seng Congress, kum u Randeep Surjewala, u Manish Tiwari, bad ka Priyanka Gandhi ki tangon jan man ka sngi ïa ka sorkar jong u Modi ha kaba ïadei bad ka jingkyrduh kam, ka jinghiar ka ïoh ka kot, ka jingkiew dor ka ‘petrol’ bad ‘diesel’, ka jingbymlerkam jong ka ‘demonetisation’, ka jingpynbna syndet ïa ka ‘lockdown’,bad kiwei de. U Bah PT pat u dang leh ban kyntiew ïa uta u Modi.

Ha ka 5 tarik mynta u bnai, ki Pastor jong ka KJP Assembly ki la bitar haduh katta katta namar ba u Myntri Rangbah, u Conrad Sangma, u la pynsangeh syndet noh ïa ka jingïakynduh jong u bad ki, khlem kano kano ka jingai jingtip kaba thikna. Hynrei, ha shuwa ba ki arliang mamla, kata ki Pastor bad u Conrad Sangma, kin ïa poi sha ka jing ïasngewthuh jingmut, bluit mih u Bah PT ha ‘YouTube’ ban ong, “Ha ba peit na ka liang jong ka ‘safety’ (jingïada), ka sorkar ka la shim ïa ka rai jong ki ‘expert’ (ki riew stad) bad na ka daw bym lah kiar, la hap pynsangeh noh ïa ka ‘meeting’.”

Hato u Bah PT u don ha ka sorkar mo ban pynsawa kum ïa kane ka jingpynshai? Sngew pynban kumba u kren u Bah Prestone Tynsong lane u Bah AL Hek ïa kine ki kyntien! Ha ka jingshisha kum uta u ‘Chief Whip’jong ka liang pyrshah, u la dei ban tangon tyngeh ïa ka sorkar. Haba u Conrad Sangma u lah ban ïa kynduh ïa ki para myntri, ki ophisar, bad kiwei ki ‘riew paidbah, kan eh aïu ban ïakynduh shiphang ïa ki Pastor ha ïing sah jong u lada kata ka ‘Secretariat’ ka la shah kynthah ha u ‘Corona Virus’?

Da sngap bad pule ïa kiwei de ki jingleh bad jingkren, nga tharai ka don tang kawei ka kynroh kaba pynïajngai ïa u Bah PT Sawkmie bad ka Sorkar MDA jong u Conrad Sangma. Kata ka kynroh ka dei ka aiñ kaba khang ïa ki MP ne MLA ban kyntiap seng katba mon, lane kata ka ‘Anti-Defection Law’.

Bun na ngi ngin ym sngew lyngngoh shuh lada une u tyngshop ka saiñ pyrthei u kylliang jaiñ biang ban phong da kawei pat ka ‘uniform’ lada u ïoh ïa ka lad.

Kiwei ki nongïalam jong ka seng Congress ha ka jylla ruh, da ka jingsngap mynthi halor kine kiei kiei baroh, ki pyni shai ba ki sngewïahap bha bad ki ïa duhoi ïa kine ki jingkren bad jingleh jong u ‘Chief Whip’ jong ka seng, namar ba kat kum ki kyndon aiñ, lada pyntreikam shisha ïa ka ‘whip’ (shabuk), baroh ki dei ban bud ryntih ïa ka.

By | Banshan Lyngdoh