Seisoh ka jingsumar ki doktor ka NEIGRIHMS ia ka khynnah kaba shitom na ka jingkdor u budlum

Syllad | The Rising MeghalayaJune 12, 2025

Ha ka jingjop kaba khraw ha ka jingai jingshakri ha ka liang ka koit ka khiah, ki doktor ka NEIGRIHMS, Shillong ki la lah ban pyndep ia ka jingsumar kaba kongsan na ka bynta kawei ka khynnah 16 snem rta kaba ngat ha ka jingshitom kaba jur namar ka jingthut  kaba mih na ka jingkdor u budlum (abnormal curvature of the spine).

Ia kane ka jingshna ne surgery la pyndep da ka kynhun ki doktor surgical ba la ialam da u Dr. Sachlang Debbarma (Associate Professor), u Dr. Tashi G. Khonglah (Additional Professor) bad Dr. Penthungo Ezung (Senior Resident) hapoh ka jingkhmih bad ka jingbtin lynti jong u Prof. (Dr.) Sharat Agarwal bad Prof. (Dr.) Bhaskar Borgohain, Head jong ka Department hapoh ka Department of Orthopaedics, NEIGRIHMS, Shillong.

Da kaba buh ia ka nuksa ia ka jingiatreilang hapdeng ki department, la pynlong ia ka jingpeit bniah ia ki bynta jong ki shyieng kiba kham shalor ha kaba por ba la leh ia ka jingsumar kaba thikna bad ban iada na ka jingthut ha u shyieng budlum hapoh ka jingkhmih jong Dr. John Lyngdoh na ka Department of Physiology.

Ka Department of Anaesthesiology hapoh ka jingialam Dr. Rajani Thabah, ka la shim ia ka bynta kaba kongsan ban pynneh ia ka jinglong shngain jong ka nongpang ha baroh kane ka jingai jingsumar ha ryngkat ka jingiatreilang bad ki nurse kiba la shemphang bha hapoh ka jingialam jong ka sister incharge ka Watila Chungmeri bad ka jingiarp jong ki OT staff.

Kane ka khynnah ka la don ha ka jinglong jingman kaba biang ha ka koit ka khiah bad ka la nangioh bor hapoh ka jingkhmih ka kynhun jng ki nurse bad ka jingkyrshan kaba dang bteng lyngba ka jingleh ia ka physiotherapy.

U Dr. Sachlang Debbarma u la bynrap ruh ba kane ka jait jingshitom Scoliosis ka paw lyngba ka jingdon jingduna ha ka jinglong jong u budlum ha kaba lada ym ioh ia ka jingsumar kaba biang ka lah ban wanrah ia ka jingeh kaba khraw  bad thaw ia bunjait ki jingshitom kiba ktah ia ka jinglong jingim. Ka jinglap kloi bad ka jingioh sumar ha ka por kaba biang ka long kaba kongsan ia kiba kum kine ki jait jingshitom.

Lah ban kdew ba kane ka rukom aijingsumar ka dei ruh ka sien kaba nyngkong eh ba la leh ha ki jaka sumar sorkar hapoh ka thain shatei lammihngi baroh kawei.

Na ka liang u Director ka NEIGRIHMS u Prof. U Nalin Mehta u la ai khublei ia kane ka sienjam ba la shim da ka Department of Orthopaedics NEIGRIHMS kaba la wanrah ia ka jingjop ha kaba iadei bad kane ka jingai jingsumar ha u budlum hapoh kane ka thain.U la bynrap ba kum kine ki rukom treikam ki pynpaw ia ka jinglah jong ka Institute ba kan nangkiew ha kaba iadei bad ki lad jingsumar ia ki jingshitom kiba kiba jwat kiba iadei bad u budlum lyngba ka jingiatreilang.