Seisoh ka jingsumar ka NEIGRIHMS ia ka jingpang klongsnam ba kham pher ba la tip kum ka Vieussens’ Ring

Syllad | The Rising MeghalayaNovember 4, 2023

Ka Department jong ka Cardiothoracic and Vascular Surgery (CTVS) hapoh ka North Eastern Indira Gandhi Regional Institute of Health and Medical Sciences, NEIGRIHMS ka la ioh ia ka jingjop ha kaba iadei bad ka jingai jingsumar bad ka jingshna halor ka jingpang klongsnam kaba kham pher ba la tip kum ka Vieussens’ Ring with Coronary Artery Disease.

Kane ka jait jingshitom Vieussens’ arterial ring ka dei ka jait jingshitom klongsnam kaba kham pher namar ka jingthut ha ka jingpyniasoh jong ki thied snam kiba sha ka diang bad ka mon kiba pynpoi ia ka snam sha u kongsnam. Kane ka jingshitom ka wanrah ruh ia ka jingpang ha ka shadem jong u nongpang.

Ia kane ka jingsumar la pyndep da ka kynhun hapoh ka jingkhmih jong u  Dr. Amit Malviya Additional Professor Cardiology bad u Dr. Donbok Lynser Additional Professor Radiology.

Une u nongpang u la pyndep ia kane ka jingshna ne surgery ha ka 31.08.2023 lyngba ka kynhun ba la lamkhmat da u cardiac surgeon u Dr. Reuben Lamiaki Kynta Associate Professor CTVS and HOD I/C CTVS, Dr. Tabang Nyitan Assistant Professor CTVS, anaesthesiologist Dr. Neha Rawat, Assistant Professor Anesthesiology, Perfusionists (Mrinal Mandal & Ioosar Dkhar), CTVS OT bad ki ICU Nursing staff.

Mynta une u nongpang u la ioh khia na kane ka jingshitom hadien ba la bteng ban buddien ia ka jinglong jingman ka jong u naduh ba la pyndep ia ka jingsumar.

Kat haduh mynta ki don tang kumba 56 tylli kiba kum kine ki jait jingshitom ba la sakhi ha kylleng satlak ka pyrthei.

Na ka liang u Prof C Daniala, Medical Superintendent, NEIGIRHMS u la ai ka jingkhublei ia ka  Department of Cardiothoracic bad Vascular Surgery halor ka jingseisoh ha kane ka jingai jingsumar ia kane ka jait jingshitom kaba kham pher. U la pynpaw ruh ba kane ka pyni halor ka jingtbit jong ka kynhun hi baroh kawei ban pynlong ia kane ka jingsumar kaba seisoh.

Kumjuh u Prof Nalin Mehta, Director NEIGRIHMS haba pyrto ia ka kynhun baroh kawei, u la ong ba dei tang ka NEIGRIHMS ka hospital ka sorkar pdeng ha ka thain Northeast kaba la lah ban pyndep ia kane kum kane ka jingai jingsumar kaba shem shitom bad kaba kham pher.