Seisoh ka jingsumar ka NEIGRIHMS ia ka jingpang ba phylla ha ka sien ba nyngkong ha North East

Syllad | The Rising MeghalayaJune 25, 2025

Ia ka rukom aijingsumar kaba thymmai bad kaba seisoh ha ka sien kaba nyngkong ha ka thain Shatei Lammihngi ka Ri India (Northeast) la lah ban leh hapoh NEIGRIHMS, Shillong, bad kaba la ai pat ia ka jingkyrmen na ka bynta kawei ka samla kynthei kaba ngat ha ka jingshitom kaba jur kaba ktah ia ki tor.

Kane ka samla ka la ioh ia ka jingshitom kaba kham phylla ia kaba la tip kum ka “Stump Blowout”, kaba la pynlong na ka jingshah ktah kaba la saphriang ha ki tor bad kaba buh jingma ia ka jingim namar ka jingplie biang ia ka lynti lyer ba la khang da kaba leh surgery hadien ka jingpynkhuid noh ia baroh ki bynta jong jong ki tor ha u snem 2019.

Namar ka jingbym lah ban leh mardor ia ka jingsumar na ka jinglong jingman kaba don jingma ryngkat ka jingpang kaba don hapoh jong ka, kane ka nongpang ka la don ha ka jingshngain hapoh ICU lyngba ka single-lung ventilation.

Ka kynhun aijingsumar kaba kynthup ia u Dr. Vijay Noel Nongpiur (Associate Professor, Department of Pulmonary Medicine), Dr. Reuben L. Kynta (Associate Professor, Department of Cardiothoracic and Vascular Surgery), Dr. Neelamjingbha Sun (Assistant Professor, Department of Cardiothoracic and Vascular Surgery) bad Dr. Advait Mohan (Senior Resident, Department of Pulmonary Medicine), ki la thaw ia la lad kaba thymmai kaba khlem da leh surgery ha kaba la pynrung ia u stent silicone uba ha ka dur jong u Y bad thep ha ka lynti ring mynsiem.

Une u tiar u la pynlong ia ka jingkhang ba shipor ia ka tduh kaba don jingthud ha ka lynti ring mynsiem bad kaba la khanglad na ka jingshah ktah jong ka jingpang ba kan poi sha ki bynta jong u tor uba koit ba khiah bad kaba la ailad ia ka ba kan ring mynsiem khlem da ka jingkyrshan lyngba ka ventilator.

Une u silicone stent u ai ka jingiarap kaba shipor bad ka ban plielad na ka bynta ban sumar ia ka jingpang bad ban tei ia ka bor jong ka nongpang na ka bynta ka  jingsumar kaba hadien habud.

Ym kumba long ki stent kiba da ki kynja nar, hynrei une u stent u dei uba lah ban weng da kaba suk bad ka jingshngain hadien ba la dep ban sumar bad ban khang ia ka tduh kaba la shah ktah. Ia kane ka kynhun la iarap da u  Dr. Aravind (Senior Resident) bad ka Dr. Priyanka Dev (Associate Professor) na ka department of Anaesthesia.

Na ka liang u Director ka NEIGIRIHMS, u Prof. Nalin Mehta u la ai ka jingiaroh ia kane ka kynhun halor kane ka jingshem kaba thymmai ka jong ki ha ka liang ki lad jingsumar bad bynrap ba kane ka dei ka sien kaba nyngkong ba la pyndokam ia kum une u stent hapoh ka thain bad kiba kum kine ki rukom treikam ki pynpaw ia ka jinglong ba kotbor jong ka NEIGRIHMS ha ka ban pynioh ia ki lad jingsumar kiba kham thymmai hapoh kane ka thain.