Seisoh ka jingiakren pynneh jingsuk hapdeng ki Pnar bad ki Karbi ha ka thain Khanduli

Syllad | The Rising MeghalayaMay 17, 2024

Ka jingiakren ban pynneh ia ka shongsuk shongsain hapoh ka thain Khanduli hapdeng ki nongshong shnong Pnar lyngba ka Dorbar Shnong jong ka shnong Khanduli, West Jaintia Hills bad ki nongshong shnong Karbi kiba hap hapoh ka Suching Arming Border Development Committee (SABDC),  ka la long kaba seisoh.

Kane ka rai ban pynkut noh ia kane ka jingiakynad ha kane ka thain khappud bad ban wanrah pat ia ka  shongsuk shongshngain ka la wan long hadien ka jingialang jong ki ar liang ha ka 16 tarik Jymmang ha BOP ka Assam.

Lyngba kane ka jingialang la sakhi ia ka jingmynjur lang da baroh ki arliang mamla na ka bynta ban shah ban buh ia ka khyrdop lum khajna ka KAAC kumjuh ban pynsangeh ia ki kam kyntur pud hapdeng kine ki ar jylla.

Ha kane ka jingialang la wan iashim bynta ruh da ki Magistrate jong ki thain khappud ka Assam bad Meghalaya kaba kynthup ia u A Laskar, Border Magistrate, West Karbi Anglong, bad u Bah B. Langbang, Border Magistrate, West Jaiñtia Hills.

Nalor kata la pyntreikam ruh ia ki sienjam kiba pyrkhing pyrshah ia kino kino ki jingleh jingkam ki bym shym la iohbor kum ka jinglum iaki jhur khlaw kiba mih hapoh ka thain, na kaba khwai dohkha bad kiwei da kaba dain kuna T.50,000 ia kiba leh pyrshah.

Nalor kata la shim ruh ia ka rai ba ki paidbah kiba don jaka rep ha ka thain West Karbi Anglong, Assam ki dei ban pyni ia ki kot ki sla jong ki lyngkha kiba ki la ioh na ka Karbi Anglong Autonomous Council (KAAC), Diphu.

Shuh shuh la rai ruh ba ki nongshong shnong Pnar mynta ki lah ban leit rep biang sha ki jaka rep kiba don ha Karbi Anglong naduh ka 21 tarik mynta u bnai.