Sdang pyntreikam ka Sorkar na ki 7 shnong ia ka Meghalaya Residents Safety and Security Act, 2016

Syllad | The Rising MeghalayaOctober 31, 2023

Ka sorkar Meghalaya ka la pyntreikam ia ka Meghalaya Residents Safety and Security Act, 2016 da ka jingthmu ban pynthikna halor ka jingshngain jong ki nongshong shnong ka jylla da kaba bishar bniah ia ki nongshongwai kiba shong ba sah ha ki bynta bapher bapher ka jylla.

Ka jingpyntreikam ia kane ka Act kan khanglad bad iada na ki riew shim kabu ba kin ioh jaka riehtngen hapoh ka jylla bad ruh ban lah ban pyrkhing bad tehlakam ia ka jingwan rung beain jong ki briew kiba na shabar kiba thmu ban wan shong wan sah ha ki shnong bad ki thain bapher bapher ka jylla.

Halor ka jingpyntreikam ia kane ka Act, na ka liang ka sorkar ha ryngkat ka jingiatreilang bad ka NIC, Meghalaya ka la pynbna ruh da ka online application ha ka 8 tarik u Nailur ba la dep khnang ba kan pynlong ia ki nongshong shnong, kata naduh ki trai iing, ki nongshong wan kin lah ban pynrung kyrteng ia lade lyngba ki jingpynshisha na ka liang ki bor pyniaid shnong.

Kumta ruh baroh ki trai iing/ki nongshong wai kiba sah hapoh ki hynniew tylli ki shnong, kiba kynthup ia ka Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng ia kiba la jied ha ka kylla kaba nyngkong ba ki dei ban pynrung kyrteng ialade ha ka App lyngba ka url https://megrssa.nic.in ia kaba lah ban leh lyngba ki PC, Laptop, Tablet bad Smart Phone. Ki trai iing bad ki nongshong wai ki lah ban pynrung kyrteng ruh lyngba ka Mobile App da kaba shu sei (downloaded) na kane ka website.

Na ka bynta ki kot ki sla ba donkam bad kiwei ki jingtip ba bniah lah ban ioh na ka ophis jong ka Deputy Commissioner, East Khasi Hills, Shillong bad na ki Rangbah Shnong jong kine ki shnong ba la kdew.