Sdang ka Subroto Cup u DSO Jowai, jop bun kol ka North Liberty HSS & ka Nartiang Pres

Syllad | The Rising MeghalayaJune 8, 2022

Ka lympung ialehkai football ki khynnah skul, ka Inter School Subroto Cup kaba pyniaid da ka ophis u District Sports Officer, West Jaintia Hills District kala sdang haka sngi Balang ha madan Kiang Nangbah Stadium.

Ha kane sngi haduh hynriew tylli ki jingiakhun la lah ban pyndep ha kaba ka North Liberty HSS, Ka Govt/. Boys’ HSS, Kiang Nangbah Govt. HSS, Nartiang Pres HSS, Govt. Public School bad ka Ialong SS kila khur namjop.

Ha kane ka kynti ki don haduh 43 tylli ki skul kiba iashimbynta kiba kynthup haka Under-14 Boys, Under-17 Boys’ bad Under-17 Girls’. Iaka jingiakhun la pynlong haka dur jong ka knockout.

Haba phai sha ka jingiakhun kaba long mynta ka sngi haka kyrdan Under-17 Boys’, ka Ialong Secondary School kala jop da ka tie breaker da 3-2 iaka Don Bosco School, Mihmyntdu, ka Government Public School kala pynliem da 1-0 kol iaka Demthring Presbyterian Secondary School.

Ha kawei pat ka jingiakhun ka Nartiang Presbyterian kala jop da 3-0 kol iaka Police Public School. Ka Kiang Nangbah Government HS School kala jop 1-0 kol iaka Archievers Secondary School, Ummulong.

Shuh shuh ka Government Boys’ Higher Secondary School kala jop da 2-1 kol iaka Trangblang Government UP RMSA.

Ka jingiakhun kaba khatduh jong ka sngi ka North Liberty Higher Secondary School kala pynliem da 4-0 kol iaka Shangpung Government UP RMSA.