Sdang ka State Level Subroto Mukherjee Cup

Syllad | The Rising MeghalayaJuly 25, 2023

Ka tnat Directorate of Sports & Youth Affairs haka sngi Nyngkong, ka la sdang ia ka lympung ialehkai jong ka State Level Subroto Mukherjee Football Tournament 2023.

Ha kane ka kynti kaba mynta, ia ki jingialehkai jong kane ka lympung, la pynlong ia ki lai jaka kynthup iaka ha SAI, STC, NEHU, MFA Ground bad ha Madan Heh Mawlai.

Ki don haduh 576 ngut ki khynnah shynrang bad kynthei kiba la mihkhmat na ki skul bapher bapher ka jylla ha ka kyrdan iakjhun ka U-14, U-17, kin iakhun naka bynta ban ioh ia ka kabu ksiar ban mihkhmat pat ia ka jylla ha kane ka jkuh hi ka lympung kaban sa long ha nongbah Delhi mynta u snem.

Haba phai sha ki resol jong ka jingialehkai sdang, ha ka U-14 ka jingiakhun hapdeng ka West Khasi Hills St Peters Hr Sec School pyrshah ia ka East Garo Hills Bamil LP School Mansang ka la kut noh ha ka jingiakhaid kaba long da mar shi kol, katba ka East Khasi Hills Umphyrnai Presbyterian Sec School ka la lah ba kan pynliem da 12-0 pyrshah ia ka South West Khasi Hills Mawbidong Sec School,  ka Eastern West Khasi Hills Little Stars English Medium Sec School ka la lah ba kan pynliem noh ia ka South West Garo Hills Rongsang da 5-0.

Haba phai pat sha ka U-17 ki shynrang, ka  jingiakhun hapdeng ka West Jaintia Hills North Liberty Hr Sec School pyrshah ia ka West Khasi Hills Sibsingh Memorial Govt Hr Sec School ka la kut noh ha ka jingiakhaid kaba long da mar shi kol, katba ka East Khasi Hills Assam Rifles Public School ka la lah ba kan pynliem da 5-0 ia ka North Garo Hills Bakenang Sec School, ka  resol lam kylla pongpet jong ka sngi kaba sdang ka long ba ka South West Garo Hills Okkapara Sec School ka la lah ba kan pynliem da 1-0 ia ka Ri Bhoi Myngken Christian Hr Sec School, katba ka East Jaintia Hills Rymbai Presbyterian Hr Sec School ka la lah ba kan pynliem da 1-0 ia ka Eastern West Khasi Hills Mairang Presbyterian Hr Sec School.

Ka resol na ka jingiakhun ia ka U-17 ki kynthei pat ka long ba West Khasi Hills Sibsingh Memorial Govt Hr Sec School ka la lah ba kan pynliem da 6-0 ia ka South Garo Hills Telekali SSA UP School, ka East Khasi Hills Iewrynghep Sec School ka la lah ba kan pynliem noh ia ka West Garo Hills Monfort Dilni Bolchugre School da 7-0, ka Ri Bhoi Saiden Sec School ka lka pynliem da 7-0 ia ka North Garo Hills Rongrong Union UP School, ka West Jaintia Hills North Liberty Hr Sec School ka la pynliem noh ia ka Eastern West Khasi Hills Little Stars English Medium Sec School da 6-1.