Sdang ka Shillong Lajong FC da ka jingiakhaid ha ka jingiakhun pyrshah ia ka Mohammedan SC ha ka I-League

Syllad | The Rising MeghalayaNovember 4, 2023

Ka Shillong Lajong FC kaba la wanphai biang sha ka lympung ialehkai I-League kala iakhaid da 1-1 hadien ka jingtynjuh borbah pyrshah iaka Mohammedan SC haka janmiet sngi Thohdieng ha Naihati, West Bengal. Kane ka dei ka sien ialehkai kaba nyngkong jong ka Lajong haka lympung ialehkai I-League jong kane ka aiom ialehkai 2023/24.

Ka jingialehkai ka la long kaba itynnad bad kaba mariakhaid ha kaba baroh ki artylli ki team ki la iakhun na ka bynta ban ioh ia baroh ki lai point, bad ka Shillong Lajong ka la ioh ban pynkhih jar nyngkong hashwa ban kut jong ka half time lyngba u rang ialehkai shakhmat na Japan u Takuko Miki 45’+2. Hynrei u David Lalhlansanga uba la wan kum u substitute ha ka second half u la lah ban pyniakhaid na ka bynta ka Mohammedan SC ha ka minit kaba 53′.

Ka long kaba sniewbok na ka bynta u rang ap kol jong ka Shillong Lajong FC, u Bishal Lama hadien ba u la ngat ha ka jingmynsaw hadien ba u la iatyngkhuh bad u player ka Mohammeda SC u Remsanga ha ka minit kaba 57′ jong ka jingialehkai.

Lyngba kane ka Shillong Lajong ka la ioh ban khun ia ka shi point pyrshah ia ka kynhun ialehkai ba khlainbor ka Mohammedan SC, bad mynta ki la hap ban pynkhreh na ka bynta kawei pat ka jingiakhun pyrshah ia ka Neroca FC na Manipur ka ban long ha ka 9 tarik mynta u bnai hapoh SSA Stadium, Shillong ha ka por 2 baje nohphai sngi.