Sdang ka lympung ialehkai Shillong Premier League, da ka nam jop ka Rangdajied

Syllad | The Rising MeghalayaMarch 19, 2024

Hadien 10 bnai ka Shillong Sports Association ha ka 18 tarik mynta u bnai ka la lah ba kan sdang ia kawei pat ka lympung ialehkai phutbol kaba ka dang sah jong ka samoi ialehkai 2023 Shillong Premier League ne SPL.

Ha ka jingialehai sdang jong kane ka lympung, ka Rangdajiej United FC kaba bat ruh ia ka nam kum ka lahduh ha ka lympung ialehkai ka Meghalaya State League ne MSL jong ka Meghalaya Football Association ka la lah ba kan pynliem noh da 1-0 ia ka Nongthymmai S&CC.

Ia kane ka shi kol jong ka Rangdajied United FC la ioh ban thep da u Ksankupar Khongmai ha ka minit kaba 61.

Ha kane ka kynti iakhun kaba mynta kaba dei ruh ka sien  ba nyngkong ba ka Nongthymmai S&CC kan iuh kjat ha ka lympung iakhun ka SPL, la shem bad iohi ba na ka thup ialehkai ki player (player list) kiba bun na ki rang ialehkai  kidei kiba ka la wanrah na shabar, kaba long kum shi bynta ban pynkhlain ia la ka jong ka kynhun ha kane ka lympung.

Hynrei na ka liang ka Rangdajied United FC kiba bun na ki player ba la mihkhmat ia ka klob kidei ki samla ialehkai Khasi. Haba phai pat sha ka jingiakhun, marsien ia sdang ka Nongthymmai SCC ka la pynpaw ia ka rukom ialehkai kaba  tbit bad kaba da pnah bha ka jong ka, kaba da kylla ka pynlong ia ka kynhun ialehkai ka Rangdajied ba kin hap ban khmih bniah bad peitngor bha ia ka rukom ialehkai jong ka.

Wat la katta ruh la don pat ki khep ba ki ar kynhun haba ki ioh ban rah shakhmat ia ka bol, da ima shisha namar ka rukom ialehkai ka jong ki katno tam lei lei haba ka jingpyrshang ka ka shu lait salit ban pynkih ia ka jar.

Haba wan ban bteng ia ka kylla miet, ka Rangdajied United FC ka la sdang ban kham kyntiew ia la ka rukom ialehkai ka jong ka, bad suki pa suki ban tehlakam ia ka bol hapdeng ka madan, bad ha ka minit kaba 61, u Ksankupar u la ioh ia ka kabu kaba paka ban pynkhh ia ka jar.

Marsien shah thep kane ka shi kol, ka kynhun ialehkai ka Nongthymmai S&CC ka la long pynban kumba shoh tyndep ha kaba shipor lei lei, dei ka Rangdajied ka la shu ialehkai beit tang sha shilliang ka kut madan jong ka Nongthymmai, hynrei ha kaba kut, ka Rangdajied ruh kan hun ka mynsiem ban lah ban wanphai napdeng ka madan iakhun da kane ka shi kol bad khur ia ka lai poin lyngba kane ka jingjop.