Sdang ka KSU ia ka jingiakhih shong kyllain mungor bym lah pynurlong ka NEIGRIHMS ia ki jingdawa

Syllad | The Rising MeghalayaMay 2, 2025

Ka Khasi Students’ Union (KSU) ha ka 1 tarik Jymmang ka la sdang ia ka jingiakhih shong kyllain mungor kaba khlem pud hakhmat ka Administrative Block ka North Eastern Indira Gandhi Regional Institute of Health & Medical Sciences (NEIGRIHMS) kum ka dak ban pynpaw pyrshah ia ka jingpulom jong ka Institute ban pyntreikam ia ki jingdawa bapher bapher kiba kynthup ban pyntreikam ia ka bhah kaba 80:20 na ka bynta ki kynthei bad shynrang.

“Ngin ym kynriah noh na kane ka jaka. Kane ka jingiakhih kan bteng tad haduh ban da pyntreikam ia baroh ki jingdawa. Kumta, ngi dang ap ia u Director ba un leh ia kaba donkam halor kane ka phang,” ong u Chairman ka KSU Employment Cell u samla Reuben Najiar haba kren sha ki lad pathai khubor.

U la pyntip ruh ba u Director u la buh ia u Deputy jong u ban iakren bad ka KSU, hynrei “Ngi la kyntait ban iakynduh ia u namar ngin ym mih na kane ka jaka tad haduh ba u Director da lade un ai ka jingkular ban pyntreikam mardor ia baroh ki jingdawa ki jong ngi .”

U Samla Reuben u la ong ba ka KSU ka la dawa ban pyntreikam mardor ia ka bhah thungkam kaba 80:20 hapdeng ki kynthei bad shynrang ha ka kam nos, ka rta thungkam ba la buh, ka jingbuh ia ki exam centre ha Meghalaya lem bad kiwei pat kiba iadei bad ka policy thungkam hapoh ka Institute kiba mynta ki long pyrshah ia ki jingmyntoi jong ki paid riewlum bad kiba thmu ban aijingmyntoi ia kiwei ki jaidbynriew ba kin ioh kam hapoh NEIGRIHMS.

“Ngi la iakynduh ia ki MP ka Meghalaya, uba la thoh mardor sha ka NEIGRIHMS na ka bynta ban pynbeit ia kane ka kam. Hynrei, na ka liang u Director ka NEIGRIHMS u la sngap mynthi bad u la kynnoh pynban ia ka Heath Ministry, hynrei ngi la don ia ki sakhi kiba khlain ban pyni ba ka Ministry kam don ia ka bynta kaba pura halor kane bad ka shong eh ha ka Governing Council jong ka NEIGRIHMS,” u la ong.

Kumta, ka NEIGRIHMS da ka jingioh jingbit na ka Governing Council ka lah ban pynurlong ia baroh ki jingdawa ba la dawa da ka seng. Hynrei ka long kaba sngewsih ba na ka liang u Director u la sngap mynthih halor kane ka kam kaba la pynlong ia ka seng ba kam banse ban pynlong da ka jingiakhih kaba khlem pud,” u la bynrap.

Katkum ka jingpynpaw ka jong u, watla ka tarik ba khatduh ban phah ia ki aplikeshon katkum ka jingpynbna laitkam ka long ha ka 28 tarik Iaiong, hynrei na ka liang u Director ka Institute um shym la lah satia ban pyntreikam ia baroh ki jingdawa.

“Lada ki iaid shakhmat ha kaba iadei bad ka jingthungkam, kan sa ktah ia ka Institure bad ka jingshakri ha ka liang ka koit ka khiah namar ka jingdon jong ki nos shynrang ka la tam ia ki nos kynthei. Kane kan sa ktah jur haduh katta katta. Lada kine ki nos kynthei ki la shongthait, kin ym don shuh ki nos kynthei hynrei tang ki nos shynrang hapoh NEIGRIHMS. Ka long ka bym don nongrim satia ha lyndet jong kane ka jingthungkam,” u la ong.

Kane ka jingiakhih jong ka KSU ka la long ruh hapdeng ka jingpahara kaba jur.