Sdang ka jingtohkit halor ka bamsap shna surok Shillong, Nongstoin, Tura ba T.2,300 klur

Syllad | The Rising MeghalayaOctober 23, 2024

Ka Tnad pulit ka Jylla ka la sdang ban pynlong ia ka jingtohkit halor ka jingkynnoh kam bamsap kaba da ki klur kaba kynthup ia ka jingdonkti jong ki Kontraktor bad ki heh Engineer ka Sorkar Jylla ha kaba pyntrei ia ka projek shna surok Shillong-Nongstoin-Rongjeng-Tura kaba la mang ha ka jinglut kaba haduh T.2,300 klur.

“Ngi la dep ban register case. Ngi la sdang mynta ia ka jingtohkit.Ia mynta tang kane kaba ngi lah ban pynpaw,” ong u heh pulit haka 22 tarik u Risaw.

Ki don haduh khyndai ngut ki briew kaba kynthup ia ki heh Engineer ka Sorkar Jylla bad ki heh jong ki artylli ki kompeni shimet na Telangana bad Haryana kiba la shah jer kyrteng ha ka ejahar ba la mudui da u Chief Engineer ka Tnad PWD lyngba ka jingbthah jong ka Sorkar Jylla.

Watla katta une u heh pulit u la ong ba haduh mynta ym pat shym la kem iano iano ruh. “Ngi dang tih bniah ha kaba iadei bad kane ka case. Ngi la bishar bniah ia ki kot ki sla bad ki sakhi satar,,” u la ong.

“Ki don shibun ki jingleh bym hok kiba la pynbor ia ka Sorkar ba kan mudui da ka ejahar halor kane ka projek shna surok kaba la kot haduh palat T.2,300 klur,” ong u heh ophisar ka Tnad PWD.

Kane ka surok kaba pyniasoh ia ka Nongbah Shillong bad ka Tura lyngba ka Nongstoin bad Rongjeng ka dei kaba la mynjur ha u snem 2010 kum shibynta jong ka Special Road Development Programme-North East jong ka Sorkar India.

Katkum ka jingpynpaw da ki heh ka Tnad PWD la ong ba kane ka projek kaba la mang ha kaba nyngkong T.1303.83 klur hynrei la pynkiew ia ka mangtyngka la bunsien bad kaba la poi haduh ka T.2366.77 klur. Ka tarik ba la buh ban pyndep ia kane ka projek ka dei ha u snem 2014.

Napdeng kine ki khyndai ngut kiba la shah ujor ha kane ka ejahar ki kynthup ia ki heh jong ki artylli ki kompeni shimet, u Chief Engineer ka PWD, Executive Engineer bad kiwei pat.