Sdang ka jingrakhe dap 75 snem ka Jingiaseng Samla Balang Presbyterian Mustem

Syllad | The Rising MeghalayaApril 25, 2025

Ka Jingiaseng Samla Balang Presbyterian Mustem haka 23 tarik Iaiong kala sdang ban lehkmen iaka jingrakhe dap 75 snem ne Platinum Jubilee (1950-2025).

Kum ka dak jong ka jingpynsah jingkymaw iaka Jingiaseng Samla ha ryngkat ka jingiatreilang bad ka Balang baroh kawei la plie ia u mot sah jingkynmaw da u Tbn. OB Huwa Moderator Jowai Presbytery.

Nalorkata, la pyllait ruh iaka momento da u Tbn. ML Pyrtuh Chairman jong ka Jingiaseng Samla District bad ka jingpynher iaka lama jubilee da u Tbn. H Shylla Chairman Balang.

Ha kane ka sngi la pynlong ruh iaka jingiaseng kyrpang hapoh ka iingmane jong ka balang ba la pyniaid da u Iahmeheibha Ladia Chairman Jingiaseng Samla bad la ioh ka jingpule bad duwai na u Tuboimi Nongpluh bad iaka khana lyngkot jong ka Jingiaseng Samla la iathuh da u Secretary Yozarky Khlem.

La pynphuh pynphieng iaka jingiaseng da ka jingrwai Choir na ki Jingiaseng Samla jong ka Balang bad ka jingiasyllok na ka ktein jong U Blei da u Rev. E. Nongpluh.

U Rev. E Nongpluh haka jingiasyllok ula kren halor ka phang ‘U Khrist ha phi ka Jingkyrmen ka burom”. Ula ong u Khrist u long ka jingkyrmen ym tang na ka bynta kaba mynta hynrei ka ban sa wan ruh.

Ula kyntu ruh iaki nongïalam jong ka Jingiaseng Samla ba haba ki long kum ki nongialam kim dei ban shaniah tang ha ka bor jong ka jingstad briew, hynrei kaba kongsan ka long ban shaniah ha u Blei khnang ba kin lah ban ialam iaka Jingiaseng Samla katkum ka mon jong U Blei.

Ula kitbok kitrwiang ruh iaki khun samla ka balang ba lyngba kane ka jubilee kin ioh mad shisha ia u Khrist haka jingim ka jong ki bad ba kin long ki samla kiba shaniah bad aiti lut ha u Blei.